Лінкі ўнівэрсальнага доступу

БЕЛАРУСКІМ ДЫРЭКТАРАМ ЗЬМЕНШЫЛІ ЗАРОБКІ


Міхал Стэльмак, Менск

Урадавая пастанова тычыцца кіраўнікоў дзяржаўных прадпрыемстваў. Былы генэральны дырэктар вытворчага аб’яднаньня “Амкадор” Васіль Шлындзікаў, які ўзначальвае Асацыяцыю садзеяньня эканамічнаму разьвіцьцю, камэнтуючы ўрадавую навіну, зазначыў:

(Шлындзікаў: ) "Я мяркую, што гэтае абмежаваньне закранула толькі некаторых дырэктараў. Пераважнай большасьці яно ня тычыцца.

Абмежаваньне скіраванае найперш на дасягненьне “ўраўнілаўкі” ў заробках, каб задаволіць патрабаваньні электарату. Бо “нізы” лічаць, што дырэктар нібыта не павінен зарабляць больш за рабочага. Дырэктар мог бы разьлічваць на даплаты ў выглядзе прэміяў. Аднак зараз атрымаць прэміі ня так проста, бо ўся эканоміка рушыцца", — мяркуе Васіль Шлындзікаў.

Ці задавальняюць цяперашнія заробкі ў дзяржаўным сэктары саміх кіраўнікоў прадпрыемстваў? З такім пытаньнем я зьвярнуўся да галоўнага рэдактара беларускага часопіса “Дырэктар” Аляксандра Каўтуненкі:

(Каўтуненка: ) "Вядома ж, не. Афіцыйны заробак вельмі маленькі. На сёньняшні дзень дырэктарскі аклад у Беларусі недзе ўсяго 90 000 рублёў. У тым ліку й кіраўніка буйнога заводу, напрыклад, МТЗ.

Між тым, у савецкі час дырэктар атрымліваў прыблізна 1 500 даляраў. І таму зараз дырэктар павінен зарабляць 1 500–2 000 даляраў. Пакуль гэтак ня зробяць, яны будуць клапаціцца не пра разьвіцьцё прадпрыемства, а пра тое, дзе грошы на жыцьцё зарабіць".

Як лічаць экспэрты, большасьць беларускіх дырэктараў жыве зь нелегальных даходаў. Нягледзячы на гэта, у поле зроку праваахоўчых органаў трапляе толькі невялікая частка кіраўнікоў. Мяркуецца, што ў гэтым найперш зацікаўленыя ўлады. Яны імкнуцца не заўважаць крымінальных парушэньняў прадстаўнікоў дырэктарскага корпусу, чакаючы ад іх за гэта палітычнай ляяльнасці.


XS
SM
MD
LG