Лінкі ўнівэрсальнага доступу

МЕНСКІ ГАРАДЗКІ СУД ПАКІНУЎ ПРЫСУД ЮЛІІ ЧЫГІР БЯЗЬ ЗЬМЕНАЎ


Алег Грузьдзіловіч, Менск

Справу Юліі Чыгір сёньня пераглядала калегія па крымінальных справах Менскага гарадзкога суду. Юлія Чыгір дамагалася скасаваньня пакараньня, але судзьдзі пакінулі ранейшае рашэньне Фрунзенскага райсуду.

Нагадаю, жонку экс-прэм'ера прызналі вінаватай у тым, што перашкаджала дзеяньням міліцыянтаў, а аднаго нават нязначна траўмавала — укусіла за вуха. Гэта адбылося летась у траўні на ганку суду за дзесяць хвілінаў да таго, як абвесьцілі прысуд экс-прэм'еру Міхаілу Чыгіру.

Міліцыянты тады не пускалі людзей, у тым ліку сваякоў экс-прэм'ера, у будынак суду.

Сёньня Юлія Чыгір прапанавала судзьдзям для прагляду відэакасэту тых падзеяў, але ейнага хадайніцтва не задаволілі. Не пажадалі судзьдзі й праслухаць магнітафонны запіс паказаньняў сьведак, якія, паводле Юліі Чыгір, разыходзяца з пратаколам працэсу ў Фрунзенскім судзе.

Перагляд справы зьвялі да прамовы Юліі Чыгір, якую судзьдзя Назарэнка некалькі разоў перапыняў, выступу адваката й патрабаваньня пракурора пакінуць прысуд бязь зьменаў.

Юлія Чыгір не хавала свайго расчараваньня. Яна кажа, што ўсё ж спадзявалася на захаваньне хаця б бачнасьці аб’ектыўнасьці судзьдзяў. Яна чакала калі не апраўданьня, то рашэньня пра перагляд. Спадарыня Чыгір перакананая, што падставаў для гэтага было дастаткова.

(Ю.Чыгір: ) "Справу прынялі на разгляд з парушэньнямі майго права на абарону. Справу разглядалі ў судзе абы-як. Пратакол фальсыфікаваны — гэта відавочна.

Ніводны зь міліцыянтаў ня даў паказаньняў, што я нешта парушала, што я лаяла іх — але прысуд пра гэта кажа. Няма ў прысудзе ніводнага дакумэнта, які б сьведчыў, што я такія дзеяньні рабіла. Нічога, акрамя таго, што я ўкусіла за вуха. Але ж для гэтага былі падставы".

Цяпер Юлія Чыгір будзе падаваць наглядную скаргу ў Вярхоўны суд, хаця мяркуе, што й гэта ніякага выніку ня дасьць. Спадзяецца яна толькі на прэзыдэнцкія выбары.

XS
SM
MD
LG