Лінкі ўнівэрсальнага доступу

ФПБ ПРАТЭСТУЕ СУПРАЦЬ СТВАРЭНЬНЯ “КІШЭННЫХ” ПРАФСАЮЗАЎ


Міхал Стэльмак, Менск

Фэдэрацыя заклікае сваіх сяброў супрацьдзейнічаць гэтаму працэсу.

Раптоўны выхад прафсаюзнай арганізацыі Беларускага мэталюргічнага заводу са складу Фэдэрацыі спрычыніўся да некаторай разгубленасьці ў асяродзьдзі прафсаюзных функцыянэраў.

Прафсаюзная эліта спрабуе спрагназаваць, на якіх прадпрыемствах улады рыхтуюць чарговыя правакацыі. Паводле вэрсіі Ўладзімера Ганчарыка, адміністрацыйны гвалт неўзабаве можа напаткаць прафсаюзныя арганізацыі МТЗ і МАЗу.

Гэтыя шматтысячныя арганізацыі зьяўляюцца асновай галіновага прафсаюзу Аўтасельгасмашу, які ёсьць найбольш пасьлядоўным крытыкам цяперашняга сацыяльна-эканамічнага курсу. А вось што думае пра пагрозу расколу гэтага прафсаюзу ягоны лідэр Аляксандар Бухвостаў:

(Бухвостаў: ) "Стварэньне “кішэнных” прафсаюзаў сёньня магчымае на любым прадпрыемстве. Усё залежыць ад таго, колькі людзей падмануць і атрымаюць іхную падтрымку. Я мяркую, што такая магчымасьць ёсьць і на прадпрыемствах нашай галіны.

З другога боку, мы ўпэўненыя, што частка сяброў прафсаюзу, частка рабочых, нягледзячы на ціск, застанецца ў нашых прафсаюзах".

Старшыня галіновага прафсаюзу лічыць, што магчымая дэстабілізацыя працоўных калектываў МТЗ і МАЗу пакуль што стрымлівае ўлады ад намеру паўтарыць прафсаюзны досьвед Беларускага мэталюргічнага заводу.

З другога боку, прафсаюзныя працэсы на асноўных беларускіх заводах, на думку экспэртаў, цесна зьвязаныя з магчымасьцю іхнай прыватызацыі напярэдадні прэзыдэнцкіх выбараў.

У прафсаюзных колах зараз абмяркоўваюць ліст былога паплечніка Лукашэнкі Леаніда Сініцына, які піша пра намер уладаў ажыцьцявіць па часе рабаўніцкую прыватызацыю найбольш прыбытковых беларускіх прадпрыемстваў.

Такі намер нібыта зьвязаны з разьлікам Аляксандра Лукашэнкі перадаць гэтыя прадпрыемствы за грошы, неабходныя яму на выбары, расейскаму бізнэсу. Фігуруюць у гэтых плянах і менскія заводы — трактарны й аўтамабільны.
XS
SM
MD
LG