Лінкі ўнівэрсальнага доступу

У МЕНСКУ ЗАТРЫМАНЫЯ ЎДЗЕЛЬНІКІ НЕСАНКЦЫЯНАВАНАЙ АКЦЫІ “ЗУБРА”


Валер Каліноўскі, Менск

Акцыя актывістаў новага руху "Зубар" рыхтавалася ва ўмовах кансьпірацыі. Але калі сямёра ейных удзельнікаў сабраліся ля будынку адміністрацыі Аляксандра Лукашэнкі ды паспрабавалі разгарнуць траснпарант з патрабаваньнем неадкладна знайсьці зьніклых Юр'я Захаранку, Віктара Ганчара, Анатоля Красоўскага й Зьмітра Завадзкага, трох зь іх адразу затрымала міліцыя.

Арганізатары акцыі назвалі імя толькі аднаго з затрыманых — Андрэй Пятроў. Рэшта ж актывістаў "Зубра" здолела разгарнуць насупраць вокнаў прэзыдэнцкай адміністрацыі плякаты з партрэтамі зьніклых ды правесьці несанкцыянаваны пікет.

Ва ўлётках, якія раздавалі ўдзельнікі пікету, зазначаецца: "Мы патрабуем актыўнага й выніковага расьсьледаваньня гучных справаў, якія паставілі Беларусь у адзін шэраг з рэжымамі кшталту піначэтаўскага".

Актывісты “Зубра” зьвяртаюцца да ранейшых кіраўнікоў КГБ і Пракуратуры Ўладзімера Мацкевіча й Алега Бажэлкі з патрабаваньнем абнародаваць інфармацыю па тых справах, якой яны валодаюць.

"Калі заўтра зьнікне яшчэ хтосьці, — зьвяртаюцца актывісты руху "Зубар" да спадароў Мацкевіча й Бажэлкі, — вінаваты ў гэтым будзе ня толькі рэжым Лукашэнкі, але й вы таксама".

Усе ўдзельнікі несанкцыянаванай акцыі "Зубра" — моладзь студэнцкага ўзросту.

Гаворыць адна з актывістак "Зубара", што трымала плякат:

(Удзельніца: ) "Нас шмат — тых, хто супраць гэткай палітыкі ў Беларусі. Мы супраць такіх сродкаў змаганьня — празь ліквідацыю палітычных канкурэнтаў.

Трэба браць рашучыя крокі дзеля росшуку гэтых людзей. Хаця я ўпэўненая, што ўлады ведаюць, дзе гэтыя людзі, якім чынам яны зьніклі й дзе цяпер.

Нядаўна Лукашэнка казаў, што думае больш увагі надзяляць гэтаму й што ён ведае, што здарылася з гэтымі людзьмі. Дык чаму ж ён ня скажа? Трэба каб распачаўся актыўны пошук гэтых людзей", — паведаміла актывістка незарэгістраванага руху "Зубар", якая назвала сябе Дар'яй Радкевіч.

Яна адмовілася казаць, колькі сяброў у гэтым руху, якая ягоная структура й пляны. Зазначыла толькі, што рух "Зубар" ня мае сваіх адмысловых лідэраў.

Новая акцыя пратэсту "Зубра" прызначаная на заўтра. Паводле словаў Дар'і Радкевіч, падставаў для правядзеньня такіх акцыяў у Беларусі вельмі шмат.


XS
SM
MD
LG