Сёньня ў Вену вылецела дэлегацыя Вярхоўнага Савету 13 скліканьня, у якую ўвайшлі два сябра сталай дэлегацыі Вярхоўнага Савету ў ПА АБСЭ — Анатоль Лябедзька й Віктар Хоміч. Разам зь імі туды накіраваліся дэпутат Уладзімер Кудзінаў і намесьнік старшыні Аб'яднанай грамадзянскай партыі Яраслаў Раманчук — сакратар дэлегацыі.
Якія ж аргумэнты на сваю карысьць яны агучаць на паседжаньні? Гаворыць супрацоўнік Цэнтральнай каардынацыйнай рады дзеля назіраньня за выбарамі Міхаіл Пліска:
(Пліска: ) "Я падрыхтаваў для нашай дэлегацыі заключэньне пра характар восеньскіх выбараў у так званую Палату прадстаўнікоў. Я зрабіў выснову, што выбары былі несправядлівыя, несвабодныя й непразрыстыя. Мы маем новыя зьвесткі, якія дазваляюць казаць, што выбары не адбыліся ў 43 акругах. Значыць, абрана толькі 67 дэпутатаў, а каб Палата пачала сваю дзейнасьць, трэба як найменш 74 дэпутаты".
Падзяліцца прагнозам пра магчымыя вынікі галасаваньня ў Вене я папрасіў сябра сталай дэлегацыі Вярхоўнага Савету ў ПА АБСЭ Ўладзімера Нісьцюка. І вось што ён адзначыў:
(Нісьцюк: ) "Ёсьць такая магчымасьць — не прымаць цяпер ніякіх новых ініцыятываў у межах Парлямэнцкай Асамблеі АБСЭ. Працэдурна гэтак можа быць: мандатная камісія заслухае два даклады — адной і другой дэлегацыі, і прыме рашэньне, каб Сталы камітэт Парлямэнцкай Асамблеі зьняў гэтае пытаньне з парадку дня як неактуальнае і якое ня мае юрыдычных падставаў. Не разглядаць такога пытаньня. Ці правесьці работу з усімі сябрамі Парлямэнцкай Асамблеі — няма зараз ні юрыдычных, ні палітычных, ні маральных, ніякіх падставаў, каб пераглядаць гэтае рашэньне ці прымаць новае".
На сёньняшнім паседжаньні Кансультацыйнай рады амбасадар Вік паведаміў, што ў сакавіку Беларусь мяркуюць наведаць прадстаўнікі міжнародных структураў.
З 5 па 7 сакавіка Менск наведае Парлямэнцкая тройка. 26-27 сакавіка ў Беларусі будзе ўпаўнаважаны ПА АБСЭ ў пытаньнях сродкаў масавай інфармацыі й свабоды слова сп. Дувэ. Зараз удакладняюцца дакладныя тэрміны яшчэ двух візытаў: тройкі Эўразьвязу й дзейнага старшыні АБСЭ міністра замежных справаў Румыніі Мірча Джэана.
Адметна, што прадстаўнікоў такога ўзроўню ў Менску не было ад часу адкрыцьця тут КНГ АБСЭ, калі на гэтую цырымонію прыяжджаў тагачасны дзейны старшыня, міністар замежных справаў Польшчы Браніслаў Герэмэк.
Да таго ж, і Парлямэнцкая тройка, якая наведае Менск на пачатку наступнага месяца, складаецца з такіх уплывовых палітыкаў як старшыня ПА АБСЭ Адрыян Сэвэрын, кіраўнік Палітычнага камітэту ПА Рады Эўропы Тэры Дэйвіс ды іншых.