Лінкі ўнівэрсальнага доступу

logo-print

У ВОРШЫ ЗАЧЫНЕНЫ НАРОДНЫ ЎНІВЭРСЫТЭТ


Браніслава Станкевіч, Ворша


Старшыня Аршанскага выканкаму Валянцін Майсяюк загадаў павесіць замок на дзьверы Дому культуры Таварыства інвалідаў па зроку. Там мінулымі выходнымі меркавалі сабрацца на лекцыі аршанскія аматары беларускай гісторыі й культуры.

Аршанскі філіял Народнага ўнівэрсытэту, які заснаваў Юры Хадыка, праіснаваў усяго каля 2 месяцаў. Цягам гэтага часу перад аршанцамі пасьпелі выступіць: палітоляг Уладзімер Роўда, эканаміст Уладзімер Кулажанка, навукоўцы Аляксандар Ярашэвіч ды Ўладзімер Емяльянчык. На адкрыцьцё ж прыяжджаў і сам заснавальнік Народнага ўнівэрсытэту Юры Хадыка.

Спачатку гарадзкія ўлады прэтэнзіяў да грамадзкай навучальнай установы ня мелі. Але 19 студзеня пра адкрыцьцё Народнага ўнівэрсытэту ў Воршы напісала расейская газэта "Известия", тады пра гэты факт даведаліся ў найвышэйшых колах дзяржаўнае ўлады.

Арганізатары ўнівэрсытэту кажуць, што ў Воршу патэлефанаваў сам кіраўнік адміністрацыі Лукашэнкі Міхаіл Мясьніковіч. Ён загадаў старшыні гарвыканкаму Воршы Валянціну Майсеюку "разабрацца" з унівэрсытэтам.

Як вынік, мусіў быў звольніцца па ўласным жаданьні дырэктар СШ № 4 Станіслаў Храпавіцкі — адзін са стваральнікаў аршанскага філіялу ды старшыня аршанскай арганізацыі Аб'яднанай грамадзянскай партыі. Менавіта ў гэтай школе адбыліся першыя заняткі ўнівэрсытэту. Цяпер Станіслаў Храпавіцкі загадвае дзіцячым садком.

Алесь Шутаў, другі арганізатар Народнага ўнівэрсытэту, асабіста патэлефанаваў кожнаму з слухачоў, каб патлумачыць, хто й чаму ў суботу ды нядзелю сарваў заняткі.

XS
SM
MD
LG