Лінкі ўнівэрсальнага доступу

СТАРАВОЙТАВУ ВЯРНУЛІ ДАЧУ


Алег Грузьдзіловіч, Менск

Кіраўскі раённы суд паставіў кропку ў гісторыі падзелу маёмасьці Васіля Старавойтава. Днямі лецішча ў Крыме суд пастанавіў перадаць былой жонцы былога старшыні “Рассвету” Іне Старавойтавай.

Дакумэнты пра спыненьне продажу лецішча з аўкцыёну накіраваныя кіраўскай судзьдзёй Надзеяй Чмарай у адпаведныя інстанцыі Ўкраіны й Крыму.

Маёмасьць, якая адышла Іне Старавойтавай, суд ацаніў прыблізна на 5 000 даляраў. Гэта трохпакаёвая кватэра ў пасёлку Абрыкосаўка непадалёк ад Фэадосіі, мэбля ў ёй, а таксама частка акцыяў былой акцыянэрнай гаспадаркі “Рассвет”. Кіраўскі суд задаволіў прэтэнзіі Іны Старавойтавай на гэтую маёмасьць, паколькі яна была нажытая разам з Васілём Старавойтавым за часам іхнага сумеснага жыцьця.

Хаця сам Васіль Старавойтаў на лецішча правоў ужо ня мае і не прэтэндуе на яго, рашэньне Кіраўскага суду ён ўсё ж вітаў.

(Старавойтаў: ) "Тое, што лецішча ў Крыме вяртаецца да сям'і — добра. Што з таго, што гаспадар ня я? Ня мае значэньня. Гэта ж былая мая жонка, дзеці могуць туды ехаць адпачываць. Так бы незаконна пагасілі лецішчам пазыкі тыя — і якая б мне карысьць?"

Старавойтаў мае дзьве дачкі й чацьвёра ўнукаў. Пасля затрыманьня Васіля Старавойтава судовы перасьлед спазналі сем'і абедзьвюх дачок былога старшыні “Рассвету” — да ўмоўнага пакараньня была асуджаная дачка Тацяна; абодва зяці атрымалі розныя тэрміны зьняволеньня.

Цяпер яны ўжо на волі. Сям'я старэйшай дачкі Старавойтава Натальлі, якая раней узначальвала "рассветаўскі" банк, зьехала ў Маскву. Час ад часу ў Мышкавічы, дзе жыве Старавойтаў, да яго прыяжджаюць унукі, і цяпер дзядуля спадзяецца, што гэтыя наведваньні будуць часьцейшымі, бо ўнукі змогуць карыстацца ягоным былым лецішчам у Крыме. Сам Васіль Старавойтаў кажа, што езьдзіць туды не зьбіраецца.

Экс-старшыня “Рассвету” адмовіўся камэнтаваць зьмены ў стаўленьні да ягонага лёсу, якія апошнім часам дэманструе судзьдзя Надзея Чмара. Нагадаю, менавіта яна ачольвала судовую калегію, што асудзіла Старавойтава на трохгадовае зьняволеньне.




XS
SM
MD
LG