Лінкі ўнівэрсальнага доступу

Article 2001-01-19


Алег Грузьдзіловіч, Менск

Рэспубліканская пракуратура завяла крымінальную справу пасьля зьяўленьня артыкула, дзе псыхіятар вызначыў дыягназ А.Лукашэнку. Гэта пакуль не адбілася на працы рэдакцыі газэты “Наша свабода”.

Рэдактар Павал Жук паведамляе, што рэдакцыя працуе ў ранейшым рытме, рыхтуе чарговы нумар, які павінен выйсьці ў панядзелак. Нікога з супрацоўнікаў рэдакцыі на допыты сьледчыя пакуль не выклікалі. Але Павал Жук не выключае, што з панядзелка сьледчыя актывізуюцца, а асабіста ён можа адчуць гэта й раней.

Спадар Жук згадвае ціск на газэту “Навіны” восеньню 1999 году, калі быў надрукаваны артыкул з крытыкай цяперашняга генэральнага пракурора Віктара Шэймана.

(Жук: ) "Ну я думаю, што ў панядзелак усё пачнецца. Што там у выходныя нешта рабіць? Проста могуць сцапаць у суботу–нядзелю, зь іх можа стацца. Тым разам, як з Шэйманам разьбіраліся, Лука за Шэймана гарой стаў — дык цяпер гэты за яго, я так думаю".

Павал Жук мяркуе, што ўзбуджэньне справы паводле крымінальнага артыкулу — вялікая памылка пракуратуры, бо гэта пацягне грамадзкую ўвагу да псыхічнага стану кіраўніка дзяржавы, чаго ўлады якраз хацелі б пазьбегнуць. Такім чынам, паводле Жука, Віктар Шэйман аказаў свайму начальніку мядзьведжую паслугу.

(Жук: ) "Яны трапілі ў дурное становішча. Відаць, гэта з-за недахопу адукацыі. Калі заведзеная крымінальная справа па факце паклёпу, дык трэба даказваць факт паклёпу — быў ён ці не. Дзеля гэтага трэба мець дакладныя зьвесткі пра стан псыхічнага здароўя спадара Лукашэнкі".

Паводле Жука, сёньня ён даў ужо больш як дзесяць інтэрвію розным выданьням і агенцыям з прычыны ўзбуджэньня крымінальнай справы, якая толькі павысіла цікаўнасць да дыягназу, які паставіў Лукашэнку незалежны экспэрт Шчыгельскі.

Тымчасам калегі Жука ўжо робяць захады, каб дамапагчы яму ў змаганьні за газэту. Беларуская асацыяцыя журналістаў вывучае становішча й рыхтуе адпаведнае даукмэнты на захады пракуратуры. Распавядае віцэ-прэзыдэнт БАЖу Анатоль Гуляеў.

(Гуляеў: ) "Мы зьвяртаемся да ўсіх нашых калег, перадамо ва ўсе праваабарончыя й журналісцкія арганізацыі, зь якімі супрацоўнічаем, паведамленьне пра тое, што ўзбудзілі крымінальную справу. Упершыню ў Беларусі прымянілі артыкул новага Крымінальнага кодэксу — пра абарону гонару й годнасьці прэзыдэнта. На гэта зьвернем ўсіхную увагу.

Пакуль што пачакаем водгукаў ад нашых калегаў ды партнэраў у сумеснай барацьбе за свабоду слова. А там будуць ужо нейкія іншыя дзеяньні".
XS
SM
MD
LG