Лінкі ўнівэрсальнага доступу

Навіны 10 студзеня 2001 г.


Уладзімер Глод, Менск

На паседжаньні Кансультацыйнай рады апазыцыйных палітычных партыяў было паведамлена, што 22 студзеня новы старшыня АБСЭ міністар замежных справаў Румыніі Мірча Джэана прыме ў Бухарэсьце кіраўнікоў місіяў АБСЭ. На гэтую сустрэчу запрошаны і кіраўнік КНГ АБСЭ ў Беларусі амбасадар Вік.

22 студзеня новы старшыня АБСЭ (з 1 студзеня гэтая пасада перайшла да кіраўніка зьнешнепалітычнага ведамства Румыніі Мірча Джэана) зьбірае ў Бухарэсьце кіраўнікоў усіх місіяў АБСЭ. Сярод іх будзе і амбасадар Вік.

Паведаміў пра гэта сёньня сп. Вік на паседжаньні Кансультацыйнай рады апазыцыйных палітычных партыяў. Гэта і вызначыла асноўную тэму абмеркаваньня — стан інфармацыйнага забесьпячэньня беларускага грамадзтва пад час выбарчых кампаніяў. Чаму менавіта гэтая ўмова прызнаньня выбараў дэмакратычнымі і свабоднымі стала галоўнай?

Вось як тлумачыць сытуацыю ўдзельнік сёньняшняга паседжаньня, экспэрт у галіне СМІ Вячаслаў Герасіменка:

(Герасіменка: ) "Аналізуючы хаду так званай выбарчай парлямэнцкай кампаніі ў Беларусі, ясна вымалёўваюцца дзьве прычыны, чаму з прадастаўнікоў дэмакратычнай апазыцыі амаль ніхто ня стаў дэпутатам гэтага так званага парлямэнту. Першая — недасканаласьць выбарчага кодэксу, другая — адсутнасьць аб'ектыўнай, справядлівай інфармацыі ў СМІ, якія падкантрольныя ўладзе.

Каардынацыйная рада апазыцыйных палітычных партый вырашыла ізноў зьвярнуцца да пытаньня доступу апазыцыі да дзяржаўных СМІ.

Гэта вельмі дзіўна, калі ў часе мінулай выбарчай кампаніі па дзяржаўнай тэлевізіі і радыё не кандыдат у дэпутаты тлумачыў сваю пазыцыю, сваю праграму, а за яго рабілі гэта іншыя — як правіла, прадстаўнікі ўлады. Гэта сьмешна і дзіўна. Вось чаму сёньня я лічу, і гэтак лічыць Каардынацыйная рада апазыцыйных партыяў, што доступ апазыцыі да дзяржаўных СМІ — найпершае пытаньне".

Прадстаўнікі палітычных партыяў зьвярнуліся да амбасадара Віка зь дзьвюма просьбамі: паведаміць беларускаму ўрадаваму боку пра гатовасьць палітычнай апазыцыі ўзнавіць кансультацыі экспэртаў у галіне СМІ, што былі перапыненыя яшчэ ў лістападзе 1999 году; і паведаміць у Бухарэсьце пра тое, што беларускія ўлады, насуперак законам і абавязкам перад міжнароднай супольнасьцю, практычна цалкам забаранілі доступ палітычнай апазыцыі да дзяржаўных мэдыяў.

Амбасадар Вік пацьвердзіў таксама намер КНГ АБСЭ дапамагаць беларускім унутраным назіральнікам у назіраньні за паўторнымі выбарамі ў Палату прадстаўнікоў. Гэта неабходна, каб правесьці рэпэтыцыю перад прэзыдэнцкімі выбарамі.

З дасьведчаных крыніцаў стала вядома і пра тое, што КНГ АБСЭ прапанавала ўдзельнічаць у гэтай акцыі і тым недзяржаўным грамадзкім арганізацыям, якія падтрымліваюць палітыку цяперашніх беларускіх уладаў. Гэта дапамагло б і такім арганізацыям рэальна пабачыць мэханізм выбарчай кампаніі. І хаця адпаведныя захады з боку КНГ былі зробленыя яшчэ ў сьнежні, пакуль ніводная з такіх арганізацыяў на прапанову не адгукнулася.

XS
SM
MD
LG