Лінкі ўнівэрсальнага доступу

Навіны 03 жніўня 2000 г.


Ганна Навумовіч, Менск

На паседжаньні Міністэрства аховы здароўя мусіць быць вырашаны далейшы лёс Інстытуту радыяцыйнае мэдыцыны "Белрад". Міністэрства хоча прыпыніць дзейнасьць інстытуту, зьвязаную з вымярэньнямі дозаў радыяцыі, атрыманых беларусамі.

Канфлікт паміж Міністэрствам аховы здароўя і незалежнымі экспэртамі, якія вывучаюць радыяцыйную сытуацыю ў Беларусі, пачаўся ўжо даўно. Экспэртная група, у склад якой уваходзіў і кіраўнік інстытуту "Белрад" Васіль Несьцярэнка, некалькі разоў абвяргала дадзеныя міністэрства. Усе гэтыя факты былі адлюстраваныя ў ня даўна падпісаным Несьцярэнкам адкрытым лісьце, які быў адрасаваны беларускаму грамадзтву й шэрагу міжнародных арганізацыяў. Незалежныя адмыслоўцы знайшлі сур'ёзныя памылкі ў складзеным міністэрскімі спэцыялістамі каталёгу дозаў 1998 году.

Дарэчы, высьветлілася, што ў Беларусі нейкім загадкавым чынам зьнікаюць забруджаныя вёскі. Калі ў каталёгу 92-га году беларусаў, якія жывуць на забруджаных тэрыторыях, было каля 2 мільёнаў, дык у 1998 годзе іх чамусьці стала толькі 56 тысячаў. У каталёгу 92-га году было вызначана больш за тры з паловаю тысячы забруджаных вёсак, у каталёгу 99-га іх засталося толькі 850.

Паводле дадзеных незалежных адмыслоўцаў, радыяцыйныя дозы, якія атрымліваюць жыхары забруджаных раёнаў, у каталёгу 98-га году былі заніжаныя ад 3 да 16 разоў, а ў каталёгу 99-га году – ад 3 да 8 разоў.

У лісьце было сказана, што Міністэрства аховы здароўя працуе паводле састарэлых ускосных мэтодыкаў, у той час як Інстытут "Белрад" ужывае адмысловыя фізычныя лябараторыі, гэтак званыя "лічыльнікі выпраменьваньня чалавека", якія дазваляюць рабіць наўпроставыя вымярэньні атрыманых людзьмі дозаў.

Першая камісія зь Міністэрства аховы здароўя прыйшла ў Інстытут "Белрад" у красавіку сёлета. Чыноўнікі хацелі даведацца, ці мае інстытут ліцэнзіі на выкарыстаньне лябараторыяў, хаця такія ліцэнзіі паводле беларускага заканадаўства непатрэбныя. У ліпені ў інстытут прыйшоў ліст зь Міністэрства аховы здароўя. Міністар Зелянкевіч прапанаваў "Белраду" прыпыніць дзейнасьць інстытуту, зьвязаную зь лічыльнікамі выпраменьваньня чалавека. Ігар Зелянкевіч лічыць, што гэта – мэдычная дзейнасьць, і на яе патрэбная ліцэнзія ягонага міністэрства. У той жа час міжнародныя экспэрты, якія працавалі ў Беларусі на запрашэньне Міністэрства ў справах надзвычайных сытуацыяў, вырашылі, што лябараторыі зьяўляюцца фізычнымі, а не мэдычнымі.

Вынікі сёньняшняе нарады ў Міністэрстве аховы здароўя пакуль невядомыя. Васіль Несьцярэнка спадзяецца, што інстытуту ўсё ж дазволяць праводзіць дасьледваньні ў забруджаных раёнах.

XS
SM
MD
LG