Лінкі ўнівэрсальнага доступу

logo-print

Навіны 28 лютага 2000 г.


Валер Каліноўскі, Менск

У Інфармацыйным цэнтры Амбасады ЗША ў Менску адбылася прэзэнтацыя справаздачы Дзяржаўнага дэпартамэнту Злучаных Штатаў аб стане правоў чалавека ў Беларусі ў 1999 годзе. На сустрэчу былі запрошаныя беларускія праваабаронцы, лідэры партыяў, пацярпелыя ад палітычных рэпрэсіяў, прадстаўнікі беларускага вонкапалітычнага ведамства, замежныя дыпляматы, а таксама супрацоўніца Бюро ў справах дэмакратыі, правох чалавека й працы Дзяржаўнага дэпартамэнту ЗША Патрысія Дэйвіс.

З прывітальным словам перад прысутнымі выступіў амбасадар Злучаных Штатаў Амэрыкі Дэніэл Спэкгард. Ён зазначыў, што Справаздача Дзяржаўнага дэпартамэнту не зьяўляецца палітычным дакумэнтам, бо акрэсьлівае сытуацыю з выкананьнем тых фундамэнтальных правоў і свабодаў чалавека, што прадугледжваюцца міжнароднымі дакумэнтамі, якія падпісаныя Рэспублікай Беларусь. Амбасадар Спэкгард выказаў пажаданьне, каб беларускі ўрад успрымаў гэтую крытыку адэкватна. Гаворыць Дэніэл Спэкгард:

(Спэкгард: ) "Гэты даклад паказвае, што ўрад Беларусі ня змог забясьпечыць нават мінімальныя стандарты ў сфэры правоў чалавека. І па сёньняшні дзень ён не прадэманстраваў сваю палітычную волю дзеля паляпшэньня сытуацыі. Як гаворыцца ў справаздачы, урад Беларусі выказаў непавагу да асноўных прынцыпаў у галіне правоў і свабодаў грамадзянаў".

Напрамак пазытыўнага разьвіцьця ў Беларусі, на думку спадара Спэкгарда, быў за апошнія паўгады акрэсьлены палітычнымі сіламі краіны з дапамогаю АБСЭ. Гэта, перш за ўсё, правядзеньне свабодных і справядлівых выбараў, пашырэньне доступу палітычных сілаў да дзяржаўных сродкаў масавай інфармацыі, выкананьне прынцыпу падзелу ўладаў і стварэньне атмасфэры павагі да правоў чалавека, што прадугледжвае спыненьне дыскрымінацыі палітычных партыяў, незалежных газэтаў, няўрадавах арганізацыяў, вызваленьне палітычных вязьняў. Гаворыць Дэніэл Спэкгард:

(Спэкгард: ) "Злучаныя Штаты расчараваныя, што ў гэтых сфэрах за апошнія паўгады не было вялікага прагрэсу. Але нядаўна мы заўважылі сыгналы ад ўраду, што ён хоча пачаць дыялёг з дапамогаю АБСЭ. Для ўраду Беларусі вельмі важна зразумець тэрміновасьць гэтае задачы і неабходнасьць пачаць сапраўдны дыялёг з дапамогаю прадстаўнікоў АБСЭ… І калі вы пачынаеце вырашаць праблему паляпшэньня сытуацыі з правамі чалавека ў вашай краіне, то я хацеў бы, каб вы ведалі, што сэрцы й малітвы амэрыканскіх людзей з вамі".

Прадстаўніца Бюро Дзяржаўнага дэпартамэнту ЗША ў справах дэмакратыі, правох чалавека й працы Патрысія Дэйвіс паведаміла, што яна правяла сустрэчы з прадстаўнікамі беларускага Міністэрства замежных справаў, якія выказалі зацікаўленасьць у пачатку дыялёгу з прадстаўнікамі Дзяржаўнага дэпартамэнту Злучаных Штатаў адносна зьместу й высноваў гэтае справаздачы.

Старшыня Беларускага Гэльсынскага камітэту Тацяна Процька ў інтэрвію "Радыё Свабода" паведаміла, што толькі яе арганізацыя замовіла семдзесят экзэмпляраў дакладу, каб распаўсюдзіць іх сярод сваіх актывістаў, выкарыстаць на сэмінарах і азнаёміць прадстастўнікоў уладных струтураў на месцах…

Гаворыць Тацяна Процька: "З самога дакладу бачна, што Беларусь ня проста краіна, за якой назіраюць і робяць нейкія высновы, а ёсьць пэўны боль за тое, што ў нас адбываецца. Бо, як сёньня сказаў амбасадар (і так яно на самой справе ёсьць), Беларусь выпадае з шэрагу цывізаваных краінаў, якія знаходзяцца ў цэнтры Эўропы, менавіта ў пытаньнях правоў чалавека", – адзначыла старшыня Беларускага Гэльсынскага камітэту Тацяна Процька.

Прадстаўнікі Міністэрства замежных справаў Беларусі, якія прысутнічалі на прэзэнтацыі, аніяк не адрэагавалі на крытыку, што прагучала на адрэсу беларускіх уладаў.

XS
SM
MD
LG