Лінкі ўнівэрсальнага доступу

Навіны 17 лютага 2000 г.


Любоў Лунёва, Менск

Намесьнік кіраўніка аддзелу ўласнае бясьпекі гарадзкой управы нутраных справаў Менску Ўладзімер Кучараў наведаў сёньня офіс Беларускай асацыяцыі журналістаў. Супрацоўнікі мас-медыя спадзяваліся пачуць ад яго адказ на свой адкрыты ліст пратэсту супраць перашкодаў, якая чыніць міліцыя журналістам пры выкананьні імі прафэсійных абавязкаў.

Нагодаю да сустрэчы міліцэйскага чыноўніка з журналістамі стаў адкрыты ліст супрацоўнікаў мас-мэдыя да праваахоўных ворганаў з патрабаваньнем правесьці дасьледваньне сытуацыі, што мела месца 31 студзеня каля будынку Гарадзкога суду Менску. У той дзень за гадзіну да пачатку судовага працэсу над экс-прэм'ерам Міхалам Чыгіром міліцыянты ачапілі будынак суду й не пускалі журналістаў.

Абураныя рэпартэры зьвярнуліся з адкрытым лістом да праваахоўных ворганаў, патрабуючы тлумачэньняў: на якой падставе супрацоўнікі міліцыі перашкаджалі ім выконваць свае прафесійныя абавязкі.

Сёньня на сустрэчы з журналістамі спадар Кучараў ухіляўся ад наўпроставых адказаў на пастаўленыя перад ім пытаньні. Карэспандэнтка "Белорусской газеты" Ася Трацюк, адна з аўтараў адкрытага ліста, так пракамэнтавала вынікі сустрэчы:

"Мне падалося, што я не дачакаюся такога выніку, якога жадаю. Усё будзе спушчана на тармазох, у лепшым выпадку – знойдуць ахвярнага казла, зробяць нейкую заўвагу… А я ставіла пытаньне канкрэтна: "На якой падставе супрацоўнікі міліцыі парушылі маё права на працу, гарантаванае Канстытуцыяй? Хто аддаў загад выставіць міліцэйскія кардоны й не пускаць журналістаў?" Калі ніхто не загадваў, то міліцыянты дзейнічалі самастойна, парушаючы тым самым свае інструкцыі. А гэта ўжо крымінальная адказнасць".

Журналісты паведамілі спадару Кучараву: пакуль справа ня вырашыцца, яны не адступяцца ад яе. Яны занепакоеныя тым, што, пачынаючы з падзеяў 17 кастрычніка, міліцыя пасьля двухгадовага перапынку зноў пачала перашкаджаць працы рэпартэраў.

XS
SM
MD
LG