Лінкі ўнівэрсальнага доступу

logo-print

Навіны 25 студзеня 2000 г.


Аляксей Дзікавіцкі, Пінск

Гарыньская цэгла калісьці была вядомая на ўсю краіну. Зь яе пабудаваныя многія дамы на цэнтральным праспэкце Менску. Цяпер завод абліцоўна-фасаднае кэрамікі ў пасёлку Гарынь, што на Століншчыне, спынены. Яму пагражае закрыцьцё, а рабочым – звальненьне.

Гарыньскі завод абліцоўна-фасаднае кэрамікі не працуе са сьнежня. Рабочыя адпраўленыя ў вымушаныя адпачынкі. Дзьве траціны ад акладу, якія паводле калектыўнае дамовы ім павінна выплочваць адміністрацыя – не выплочваюцца. На сёньняшні дзень даўгі заводу складаюць 53 мільярды рублёў.

За апошнія некалькі гадоў выраб цэглы ў Гарыні скараціўся амаль у 20 разоў. Сярод асноўных прычынаў – састарэлае абсталяваньне ды значнае зьніжэньне тэмпаў будаўніцтва ў краіне. Ня хочуць купляць гарыньскую цэглу і ў Расеі – чыгуначныя тарыфы, а таксама розьніца ў коштах энэрганосьбітаў робіць яе неканкурэнтаздольнай.

Днямі на ініцыятыву працоўнага калектыву на заводзе адбыўся сход, дзе, акрамя адміністрацыі прадпрыемства, прысутнічалі чыноўнікі зь Міністэрства будаўніцтва й Столінскага раённага выканаўчага камітэту.

Паводле словаў намесьніка начальніка ўправы Міністэрства будаўніцтва Юрыя Барудоўскага, у міністэрстве прынятае рашэньне хадайнічаць перад гаспадарчым судом аб прызнаньні заводу банкрутам. Гэта значыць, што маёмасьць яго будзе распрададзена, і вытворчасьць калісьці знакамітага будаўнічага матэр'ялу ўжо ніколі не адродзіцца, а 163 чалавекі апынуцца на вуліцы.

Ёсьць яшчэ адно выйсьце – прыватызацыя. Знайшліся людзі, якія гатовыя ўкласьці грошы ў прадпрыемства, аднак ня могуць прабіцца праз сьцяну бюракратызму. На словах ня супраць і міністэрскія чыноўнікі, але ўсе баяцца браць на сябе адказнасьць. Намесьнік старшыні раённага выканаўчага камітэту Зельманчук так і сказаў: "Не хачу потым быць крайнім".

Рабочыя (а некаторыя зь іх працуюць на прадпрыемстве больш за 30 гадоў) вінавацяць ва ўсім неахайных дырэктароў, якія, на іхную думку, разрабавалі завод, а цяпер хочуць пазьбегнуць адказнасьці.

Пакуль невядома, які лёс чакае прадпрыемства. З амаль 100 аналягічных прадпрыемстваў, што йснавалі ў Беларусі, 20 ужо зачыненыя, калектывы некаторых звольненыя.

XS
SM
MD
LG