Лінкі ўнівэрсальнага доступу

logo-print

Навіны 27 сьнежня 1999 г.


Казімір Яноўскі, Гомель

На адрас сябры Гомельскае суполкі Беларускага Народнага Фронту Галіны Арцёменкі прыйшоў ліст зь Вярхоўнага Суда Беларусі, падпісаны старшынём Валянцінам Сукалам. У лісьце паведамляецца, што пастанова судзьдзі Цэнтральнага раёну Гомлі Марыны Дамненкі ў дачыненьні да Арцёменкі – адмененая. А пастанова судзьдзі Дамненкі была наступная – аштрафаваць Галіну Арцёменку за непадпарадкаваньне міліцыі напярэдадні акцыі 7-га лістапада.

Ліст з вышэйшай судовай інстанцыі ды яшчэ з такім зьместам быў, паводле словаў Галіны Арцёменкі, поўнай нечаканасьцю. Галіна не пісала ніякай скаргі ў сталіцу, яна падала толькі касацыйную скаргу ў гомельскі абласны суд пасьля таго, як судзьдзя Марына Дамненка аштрафавала яе на 7 мільёнаў рублёў нібыта за непадпарадкаваньне міліцыі перад пачаткам масавага шэсьця ў гонар адноўленага дзяржаўнага сьвята – дня кастрычніцкай рэвалюцыі.

Як, магчыма, памятаюць слухачы з ранейшых перадачаў, штраф Галіна расцаніла як цынізм у вышэйшай ступені. Усьлед за мужам, Яўгенам Мурашкам, яна па міласьці ўладаў засталася беспрацоўнай, да таго ж выхоўвае дваіх прыёмных дзяцей і ня можа плаціць шматмільённыя штрафы.

У касацыйнай скарзе ў гомельскі абласны суд Галіна Арцёменка паведамляла, што перад пачаткам афіцыйнай дэманстрацыі 7 лістапада невядомыя ў цывільным схапілі яе мужа, і калі яна спрабавала высьветліць хто і куды павез яго, людзі ў цывільным прычапіліся і да самой Галіны, патрабуючы разгарнуць антылукашэнкаўскі плякат. Такое разьвіцьцё падзеяў пацьвердзілі і сьведкі з боку аштрафаванай жанчыны. Спадарыня Арцёменка зьвярнула таксама ўвагу на супярэчлівыя паказаньні амонаўцаў, якіх палкоўнік міліцыі Аляксандар Гаркоў прывёў у суд, і які на судзе адкрыта заяўляў, што для яго Арцёменка і, наогул, усе апазыцыянэры – антаганісты.

Наколькі ўдалося даведацца, Вярхоўны Суд сам запрасіў адміністрацыйную справу ў адносінах да Галіны Арцёменкі. Хутчэй за ўсё на такі крок паўплывалі паведамленьні СМІ і праваабарончых арганізацыяў. Вырак сапраўды быў адыёзным. У сваю чаргу судзьдзя вышэйшай судовай інстанцыі, адмяняючы пастанову судзьдзі Дамненкі, указаў на павярхоўнае дасьледаваньне матэрыялаў.

Па гэтай прычыне, як сказана, пастанова ня можа быць прызнаная законнаю і абгрунтаванаю. Адміністрацыйная справа Галіны Арцёменкі будзе наноў разглядацца ў цэнтральным судзе, але ўжо іншым судзьдзёй.

XS
SM
MD
LG