Лінкі ўнівэрсальнага доступу

Навіны 09 сьнежня 1999 г.


Міхал Стэльмак, Менск

На Менскім аўтамабільным заводзе сёньня адбыўся гвалтоўны захоп офісу Cвабоднага прафэсійнага зьвязу. Паводле атрыманых намі зьвестак, напад ажыцьцявіла службы аховы прадпрыемства ў адпаведнасьці з указаньнем кіраўніка МАЗу Валянціна Гурыновіча.

Была сканфіскаваная прафзьвязовая маёмасьць, дакумэнты прафзьвязовай арганізацыі.

Сьведкамі гэтага гвалту сталіся намесьнік старшыні Свабоднага прафэсійнага зьвязу МАЗу Зьміцер Пліс і бугальтарка Ганна Канаш. Паводле зьвестак апошняй, група захопу дамагалася ад працаўнікоў прафэсійнага зьвязу падпісаць акт канфіскацыі. Аднак абодва сьведкі адмовіліся гэта зрабіць.

А 15-й гадзіне спадарыню Канаш адпусьцілі дадому, а Зьміцер Пліс застаўся ў офісе. На момант перадачы гэтага паведамленьня ён усё яшчэ заставаўся там, але падрабязнасьці ад яго даведацца немагчыма, бо тыя, хто ўчыніў захоп, адключылі тэлефоны й выставілі ахову.

Мяркуецца, што адміністрацыя МАЗу скарыстала зручны момант. Старшыня Свабоднага прафэсійнага зьвязу Міхал Марыніч, які, нагадаем, зьяўляецца лідэрам рэспубліканскай арганізацыі прафэсійных зьвязаў мэталістаў, сёньня па прафзьвязовых справах знаходзіцца ў Салігорску.

XS
SM
MD
LG