Лінкі ўнівэрсальнага доступу

Навіны 03 лістапада 1999 г.


Алена Ціхановіч, Прага

Як паведамляецца, на 17 кіламетраў расцягнулася чарга аўтамабіляў на чачэнска-расейскай мяжы. Паводле агенцтва ў справах уцекачоў Арганізацыі Аб'яднаных Нацыяў, каля 10 тысяч чалавек зараз хочуць перабрацца з Чачні у больш бясьпечнае месца. Учора на саміце ў Осла амэрыканскі прэзыдэнт Біл Клінтан пэрсанальна зьвярнуўся да расейскага прэм'ера Уладзімера Пуціна, пераконваючы яго зьменшыць маштабы чачэнскае кампаніі.

Прэзыдэнт Клінтан у часе сустрэчы з расейскім прэм'ерам Пуціным, як паведамляе сёньня газэта "Ntw York Times", выказаў глыбокую занепакоенасьць працягам расейскіх вайсковых акцыяў у Чачні, у выніку якіх пакутуе мірнае насельніцтва.

Амэрыканскі прэзыдэнт пераконваў кіраўніка ўраду Расеі выбраць у развязцы канфлікту шлях палітычнага дыялёгу. У іншым выпадку Расеі пагражае страта міжнароднага аўтарытэту. Вашынгтон, як адзначае газэта, надае асаблівую ўвагу праблеме Чачні напярэдадні стамбульскага паседжаньня Арганізацыі па бяспецы і супрацоўніцтву ў Эўропе. Як Расея, так і ЗША, зьяўляюцца сябрамі гэтай арганізацыі, куды ўваходзяць 54 краіны. Аднак расейскае наступленьне у Чачні, што выклікала шматтысячны паток уцекачоў, як мяркуюць амэрыканскія і эўрапейскія палітыкі, можа паглыбіць канфлікт паміж ЗША і Расеяй.

Прэзыдэнт Клінтан запэўніў прэм'ера Пуціна, што ЗША прызнаюць прынцып тэрытарыяльнай цэласнасьці Расеі і права краіны абараняць сваіх грамадзянаў ад тэрарызму. Аднак амэрыканскі прэзыдэнт лічыць, што Масква пачала дзеля гэтых мэтаў ужываць палітыку, у якой зьмешваюцца чачэнскія паўстанцы і мірныя грамадзяне. І ў гэтым – галоўная прычына такой колькасці ахвяраў.

Сёньня амэрыканская газэта "Los Angeles Times" называе канкрэтныя імёны ахвяраў. Так 28-гадовая Сацыта Абдулаева і яе старэйшая сястра Маліка былі на мінулым тыдні параненыя ў часе бомбавай атакі. Аднак, дазволу перайсьці ў суседнюю Інгушэцію ім прыйшлося чакаць пяць дзён. Сёстры сьведчаць, што у калёне уцекачоў было шмат параненых.

Паводле прыблізных падлікаў яшчэ ад дзесяці да пятнаццаці тысячаў уцекачоў скапіліся на памежжы і хочуць пакінуць Чачню. Аднак памежныя пераходы ад 23 кастрычніка блякаваныя расейскімі войскамі. І хаця ў панядзелак было абвешчана пра іх адкрыццё, на самой справе, прайсьці кантрольна-прапускныя пункты змаглі толькі некалькі сотняў чалавек. З-за таго, што натоўп жадаючых быў нашмат большы, ў цісканіне дзьве жанчыны былі задушаныя да сьмерці.

Праблема заблякаванай мяжы таксама спрычынілася да яшчэ больш трагічнага выпадку, калі на мінулым тыдні канвой Чырвонага крыжа ня змог пераехаць ў бясьпечнае месца і трапіў пад абстрэл расейскай авіяцыі. У выніку, як паведамляе "Los Angeles Times", загінула 27 чалавек.

Учора ж жанчыны зь белымі сьцягамі прыйшлі з боку Інгушэціі на адін з кантрольна-прапускных пунктаў і прасілі расейскіх салдатаў прапусціць уцекачоў. Аднак іх просьба была марнаю, піша газэта. "Los Angeles Times" таксама адзначае, што расейскія войскі не дапускаюць журналістаў да месца скаплення ўцекачоў.

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG