(эфір 20 кастрычніка)
За актыўны удзел у "Маршы Свабоды" 17-гадовага Сяргея Яўменава адлічылі з навучальнага камбіната Слуцкага Райсельгасхарчу. Няпоўнагадовы жыхар вёскі Вежы, слухач згаданых курсаў Сяргей Яўменаў быў адным з той групы падлеткаў, каго пасьля затрыманьня падчас сутычкі з удзельнікамі Маршу Свабоды ў Менску міліцыянты адпусьцілі дадому. Зразумела, гэтаму папярэднічала складаньне пратаколаў. Акрамя таго, юнак, так бы мовіць, "засьвяціўся" ў адным з тэлерэпартажаў пра падзеі 17 кастрычніка якраз у момант сутычкі міліцыянтаў з дэманстрантамі. Учора раніцай , калі Сяргей Яўменаў зьявіўся на заняткі, выкладчыкі хлопцу наладзілі скандал. Асабліва стараўся старшы майстар курсаў Станіслаў Шыкула. Распавядае Сяргей Яўменаў. (Яўменаў: ) "Майстар сказаў, што бачылі па тэлевізару, што зь міліцыі яму званілі, што будзе гаварыць з дырэктарам… і, напэўна, цябе выключаць". Дырэктар навучальнага камбінату Мікалай Палазьнік паведаміў слухачу курсаў, што заўтра адбудзецца педсавет і яго, хутчэй за ўсё, адлічуць з курсаў. Сёньня раніцай я спраўдзіў інфармацыю пра магчымае выключэньне Сяргея Яўменава ў спадара Шыкулы. Той паведаміў, што акрамя выхаваўчай гутаркі, ніякіх іншых "арганізацыйных высноў" выкладчыкі і дырэкцыя рабіць ня будуць. Але праз гадзіну пасьля нашай размовы Сяргей мне патэлефанаваў і расказаў сумную навіну: яго ўсё ж адлічылі з курсаў – нібыта на той падставе, што ён не прайшоў выпрабавальны тэрмін. Сёньня ж з дапамогай кіраўніка рэгіянальнага прадстаўніцтва Дэмакратычнага Фонду Мікалая Сьмірнова Сяргей Яўменаў напісаў заяву ў Беларускі Гэльсынскі Камітэт із просьбаю абараніць ягоныя правы на вучобу.