Лінкі ўнівэрсальнага доступу

Навіны 20 жніўня 1999 г.


Юрась Карманаў, Менск

Магчымыя перамовы ўлады ды апазыцыі застаюцца галоўнай палітычнай тэмаю гэтага тыдня. Чатыры экспэртавыя групы, зацьверджаныя нарадаю апазыцыйных партыяў, мусяць выпрацаваць і прааналізаваць прапановы апазыцыі на перамовах з уладамі. У якасьці экспэртаў выступаюць сябры розных палітычных партыяў. Канчатковы склад экспэртавых групаў будзе вызначаны на наступным тыдні.

У кожную экспэртавую групу войдзе ад пяці да дзесяці чалавек, якія будуць займацца выпрацоўкай і аналізам прапавановаў па чатыром асноўным кірункам апазыцыйнай плятформы. Першая група займаецца праблемаю стварэньня свабоднага палітычнага клімату, вольнага ад страху й перасьледу. Другая каардынацыйная група — доступам апазыцыі да сродкаў масавае інфармацыі, трэцяя — выпрацоўкай працэдуры легітымізацыі дасягнутых пад час перамоваў з уладамі дамоўленасьцяў. Чацьвертая група фармальна называеца "экспэртавая група ў пытаньнях канстытуцыйнага й выбарчага права".

Але менавіта на чацьвертую экспэртавую групу прыпадае асноўны цяжар перамоўнага працэсу, бо менавіта гэтая група мусіць займацца распрацоўкай выбарчага заканадаўства, а таксама прапаноўваць мадэлі пабудовы будучага парляменту. Узначаліў гэтую групу сябра палітычнае рады Аб'яднанай Грамадзянскай партыі Міхал Пліска. Нашаму радыё ён заявіў:

(Пліска: ) "Прыйдзецца ўнасіць нейкія зьмены ў Канстытуцыю 94-га году, і таму пытаньне аб паўнамоцтвах парлямэнту — гэта вельмі актуальнае пытаньне.

Да прыкладу, тры варыянты: калі гэта дзьвюхпалатны парлямэнт, то — як павінны паміж імі разьмяркоўвацца паўнамоцтвы, а таксама вельмі важнае пытаньне — як будзе абірацца й фармавацца верхняя палата парлямэнту: ці на ўсеагульных выбарах, ці туды будуць дэлегаваць сваіх прадстаўнікоў вабласныя саветы й Менскі гарадзкі савет.

Верхняя палата парлямэнту мусіць фармавацца на ўсеагульных выбарах. Верхняя палата парлямэнту мусіць мець меншыя паўнамоцтвы за ніжэйшую палата парлямэнту.

Калі гэта аднапалатны парлямэнт, то — прэзыдэнцкая, ці парлямэнцкая рэспубліка? І як будуць разьмяркоўвацца паўнамоцтвы паміж заканадаўчай ўладаю і выканаўчай ўладаю. Ці нейкая прамежкавая сытуацыя, ёсьць чысты варыянт парлямэнцкае рэспублікі, калі прэзыдэнт абіраецца парлямэнтам".

(Карманаў: ) "Спадар Пліска, з вашых слоў я раблю выснову, што распрацаванага базыснага праэкту апазыцыі адносна фармаваньня будучага парлямэнту пакуль што няма?"

(Пліска: ) "Пакуль што няма, безумоўна, таму што зараз толькі будзе пачынацца праца. Ёсьць толькі нейкія напрацоўкі".

У гэтую ж экспэртавую групу ўвайшлі Сяргей Леўшуноў і журналіст Аляксандар Фядута, спэцыяліст у канстытуцыйным праве.

Затое групу па сродках масавае інфармацыі ачоліў экс-судзьдзя Канстытуцыйнага суду Міхал Пастухоў. Разам зь ім будуць працаваць Уладзімер Глод і, хутчэй за ўсё, Мікалай Халезін. Ён выстаўляў сваю кандыдатуру на кіраўніка экспэртавае групы. І Мікалай Халезін стане кіраўніком у выпадку адмовы кіраваць Міхала Пастухова.

Групу ў пытаньнях стварэньня свабоднага палітычнага клімату ачоліў старшыня праваабарончага Цэнтру "Вясна'96" Алесь Бяляцкі.

Каардынаваць працу экспэртавых групаў будзе дэпутат Вярхоўнага Савету Павал Данэйка. Нашаму радыё ён заявіў, што нават калі ў верасьні перамовы будуць сарваныя, то мадэлі, напрацаваныя экспэртавымі групамі, прыкладам, у выбарчым заканадаўстве й будучым парлямэнце, рана ці позна будуць запатрабаваныя.

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG