Лінкі ўнівэрсальнага доступу

Навіны 03 жніўня 1999 г.


Юрась Карманаў, Менск

Сёньня маці экс-міністра Юрыя Захаранкі, які зьнік тры месяцы таму, атрымала ліст ад чалавека, які ўдзельнічаў у выкраданьні. Зь лісту вынікае, што Захаранку выкрала спэцслужба, наўпрост падпарадкаваная Аляксандру Лукашэнку. У той жа час Аляксандар Лукашэнка прапаноўваў Міхалу Чыгіру напісаць пакаянны ліст у абмен на вызваленьне. Пасьля таго, як Чыгір адмовіўся зрабіць гэта, тэрмін сьледзтва ў ягонай справе быў працягнуты да 30 верасьня. Пра гэта нашаму радыё паведаміла жонка Міхала Чыгіра — Юлія.

Жонка зьняволенага пяты месяц экс-прэм'ера Юлія Чыгір сёньня накіравалася ў сьледчы ізалятар на спатканьне з Міхалам Чыгіром, каб данесьці да яго інфармацыю, якую ўчора распаўсюдзіла беларуская тэлевізыя й дзяржаўная газэта "Рэспубліка". Міністар нутраных справаў Беларусі Юры Сівакоў у інтэрвію БТ, а гэнэральны пракурор Алег Бажэлка ў інтэрвію "Рэспубліцы" заявілі, што супраць Міхала Чыгіра ўзбуджана дванаццаць крымінальных справаў.

Юлія Чыгір назвала распаўсюджаныя факты хлусьнёй і заявіла, што пакуль сьледзтва вядзецца паводле двух артыкулаў Крымінальнага кодэксу: крадзеж у асабліва буйных памерах (артыкул 91) і злоўжываньне службовым становішчам (артыкул 166). Гаворка йдзе пра нявернуты крэдыт у мільён даляраў і недабудаваны катэдж. Паводле вэрсыі сьледзтва, Чыгір не вярнуў 10 000 даляраў з крэдыту на будаўніцтва.

Юлія Чыгір заявіла, што аніякіх доказаў у сьледзтва няма. Сьледчыя дзеяньні не вядуцца з 12 красавіка. Сьледчыя ворганы робяць усё, каб адцягнуць суд — лічыць Юлія Чыгір, бо любы суд будзе вымушаны апраўдаць Міхала Чыгіра. Разумеючы гэта, Аляксандар Лукашэнка пачаў рабіць спробы схіліць Міхала Чыгіра да напісаньня пакаяльнага лісту.

(Чыгір: ) "І пра гэта я да сёньняшняга дню не гаварыла, але пасьля ўчорашняга выступу Сівакова я пра гэта буду гаварыць усюды. 27-га, у той дзень, калі быў працягнуты тэрмін затрыманьня майго мужа, да мяне прыяжджаў прадстаўнік Лукашэнкі — чалавек, які перадаваў мне нібыта "словы Лукашэнкі"... Ён прапанаваў мне, каб мой муж напісаў пакаяльны ліст. У гэтым лісту мусіла быць раскаяньне за ўдзел у палітычным жыцьці краіны. Ён мусіць паабяцаць прэзыдэнту, што больш палітыкаю займацца ня будзе й тады прэзыдэнт выпусьціць яго з турмы. Муж адмовіўся зрабіць гэта. Пасьля таго, на наступны дзень выступіў Бажэлка, учора выступае Сівакоў. Акрамя гэтага, на мяне йдзе ціск з боку нейкіх невядомых людзей, якія называюць сябе экстрасэнсамі, людзьмі, якія бачаць, што мой муж знаходзіцца "на валаску (як яны кажуць) ад сьмерці". Яны кажуць, што я не павінна нікому не даваць аніякіх інтэрвію, ні з кім не размаўляць пра справы майго мужа — бо гэта вельмі небясьпечна..."

Ня менш інтрыгуючыя зьвесткі паведаміла нашаму радыё жонка зьніклага экс-міністра нутраных справаў Юрыя Захранкі. Вольга Захаранка заявіла, што за тры месяцы зьвестак ад мужа не атрымала. Разам з тым, паводле словаў Вольгі Захаранкі, яна "ўпэўненая, што яго ўзяла адна са спэцслужбаў Лукашэнкі. Маці Захаранкі прыйшоў страшэнны ліст ад чалавека ня рускага (у лісьце ён паўтарае: "я баяўся Аллаха"). Ён браў удзел у захопе Захаранкі. У лісьце сказана, што загад пра захоп Захаранкі даваў асабіста Аляксандар Лукашэнка. І ў лісьце ёсьць нават такія словы, што гэтая групоўка — спэцслужба ў Лукашэнкі — нагадвае натуральнае гэстапа, і таму, сказана ў лісьце, я ня ведаю, што з вашым сынам зрабілі. Дзякуй за тое, што вы вырасьцілі такога сына. Гэтаму чалавеку ўдалося зьбегчы з гэтай спэцслужбы. Страшна за жыцьцё гэтага чалавека, які напісаў такі ліст. Ды я й сама жыву як у пекле". Вольга Захаранка паведаміла, што атрымала з пракуратуы ліст, у якім паведамляецца, што падставаў для ўзбуджэньня крымінальнае справы паводле факту зьнікненьня Юрыя Захаранкі няма. На практыцы гэта мусіць азначаць, што афіцыйныя ўлады Юрыя Захаранку не шукаюць.

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG