Лінкі ўнівэрсальнага доступу

Навіны 23 ліпеня 1999 г.


Юрась Карманаў, Менск

Судовыя разьбіральніцтвы становяцца неаддзельнай часткаю штодзённай працы незалежных журналістаў. Сёньня галоўны рэдактар газэты "ИМЯ" Ірына Халіп трэці раз за апошнія два дні была выкліканая ў пракуратуру на допыт. Супраць газэты "ИМЯ" ўзбуджаная крымінальная справа за быццам бы паклёпніцкі матэрыял на гэнэральнага пракурора Беларусі Алега Бажэлку. Спадарыні Халіп сёньня вернуты ейны пашпарт і заўтра яна зьбіраецца выляцець у ЗША. Сёньня ж на допыты былі выкліканыя журналісты "Белорусской газеты" Ягор Маёрчык і Юрась Дубіна.

Пасьля трэцяга за апошнія два дні допыту ў пракуратуры Кастрычніцкага раёну Менску галоўнага рэдактара газэты "ИМЯ" Ірыну Халіп выпусьцілі на волю.

Ёй аддалі пашпарт і квіты на самалёт у Злучаныя Штаты, якія былі сканфіскаваныя пад час учорашняга ператрусу на кватэры Ірыны Халіп на вуліцы Цнянскай.

У Злучаныя Штаты на трохтыднёвае стажаваньне Ірына Халіп зьбіраецца выляцець заўтра. Трохгадзінны ператрус на кватэры адбыўся ўчора. У выніку, як паведаміла нашаму радыё Ірына Халіп, у яе "сканфіскавалі сыстэмовы блёк ад кампутара, мой працоўны нататнік, пашпарт і ўсе дыскеты. Пакуль што я праходжу як сьведка. Абвінавачваньняў мне не прад'яўлялі, бо крымінальная справа ўзбуджаная паводле факта, а не ў адносінах да мяне".

(Карэспандэнт: ) "Скажыце, калі ласка, а як з вамі абыходзіліся, якія пытаньні вам задавалі пад час гэтага допыту?"

(Халіп: ) "Перапрашаю, я дала падпіску аб неразгалошваньні".

(Карэспандэнт: ) "Як бы вы пракамэнтавалі цяперашнюю сытуацыю?"

(Халіп: ) "Я нічога не разумею".

Гэта паведаміла Ірына Халіп, якая дагэтуль знаходзіца ў статусе сьведкі. Крымінальная справа супраць газэты "ИМЯ" ўзбуджаная ўчора зь ініцыятывы гэнэральнага пракурора Беларусі Алега Бажэлкі паводле друкаваньня газэтаю 24 чэрвеня сёлета артыкула "Віця-калгасьнік". Артыкул, як лічыць Бажэлка, узводзіць на яго паклёп.

У журналісцкім матэрыяле гаворыцца пра сяброўкія сувязі паміж гэнпракурорам і заарыштаваным кіраўніком камэрцыйнае фірмы Віктарам Лагвінцом. Гэтую сувязь і спрабуе зараз аспрэчыць Алег Бажэлка.

Сьледзтва вядуць старэйшы сьледчы гарадзкое пракуратуры Генадзь Бурштын і сьледчы кастрычніцкае пракуратуры Менску Юры Надольскі. У межах крымінальнае справы і былі праведзеныя ўчора ператрусы ў рэдакцыі й на кватэры Ірыны Халіп.

І ў той час, як Ірына Халіп давала сёньня паказаньні ў кастрычніцкай пракуратуры Менску, у пракуратуры Фрунзэнскага раёну Менску ў гэты ж час а другой гадзіне дню паводле менскага часу даваў паказаньні карэспандэнт "Белорусской газеты" Ягор Маёрчык.

Сьледчы фрунзэнскай пракуратуры Рыгор Мішнёў выклікаў спадара Маёрчыка ў якасьці сьведкі ў справе зьнікненьня Юрыя Захаранкі. Сьледчага цікавілі крыніцы інфармацыі, якімі карыстаўся Маёрчык пры падрыхтоўцы матэрыялу "Мейсца знаходжаньня Юрыя Захаранкі невядома". Артыкул надрукаваны ў "Белорусской газете" 17 траўня. Як паведаміў нашаму радыё пасьля гадзіннага допыту сам Ягор Маёрчык, асобнае справы супраць журналіста ня ўзбуджана й допыт адбываўся ў межах існуючай справы аб зьнікненьні Захаранкі.

Сьледчы паабяцаў, што Ягор Маёрчык будзе выкліканы ў пракуратуру яшчэ раз, а а 15-й гадзіне паводле гэтай жа справы пачаўся допыт яшчэ аднаго карэспандэнта "Белорусской газеты" Юрася Дубіны.

XS
SM
MD
LG