Лінкі ўнівэрсальнага доступу

Навіны 05 траўня 1999 г.


Галіна Айзенштадт, Менск

Сёньня так званая "палата прадстаўнікоў нацыянальнага сходу" Рэспублікі Беларусь падтрымала рашэньне саюзнай Скупшчыны Югаславіі аб далучэньні Саюзнай Рэспублікі Югаславія да саюзу Беларусі і Расеі.

Афіцыйна рашэньне Саюзнай Скупшчыны аб далучэньні Югаславіі да саюзу Беларусі і Расеі было перададзена ў "палату прадстаўнікоў" яшчэ 13 красавіка. Цікава зазначыць, якім чынам гэта адбылося. У беларускім друку дэталі гэтыя не ўзгадваліся. А між тым, яны даволі красамоўна сьведчаць перш за ўсё і менавіта пра палітычны характар рашэньня Югаславіі.

Амбасадар Югаславіі ў Беларусі Мікола Піякавіч патэлефанаваў віцэ-сьпікеру "палаты" Уладзімеру Канаплёву (сьпіенр Малафееў адсутнічаў) і папрасіў аб тэрміновай сустрэчы. Быў абедзены перапынак паміж пасяджэньнямі сэсіі, якая зараз ідзе ў "палаце", і Канаплёў запрасіў на сустрэчы з амбасадарам таго, каго ўдалося знайсьці: намесьніка старшыні камісіі па дзяржаўнаму будаўніцтву Мікалая Лазавіка, сябру міжнароднай камісіі Алега Гарбунова, а таксама аднаго з супрацоўнікаў сакратарыяту.

Чаму ж, аднак, югаслаўскі амбасадар праявіў такую пасьпешлівасьць? Ды таму, што на другі дзень з візытам у Белград адбываў Аляксандр Лукашэнка, да якога, як вядома, слабадан Мілошавіч ставіцца асабліва прыхільна і якога сустракаў потым з такім ушанаваньнем, якое не было праяўлена нават да расейскага прэмьера Прымакова Таму пастанова Скупшчыны аб далучэньні да саюзу Беларусі і Расеі была перададзеная ў "палату прадстаўнікоў" раней, чым у Дзярждуму Расеі. трэба зазначыць, што Аляксандр Лукашэнка - адзіны з прэзыдэнтаў краінаў СНД, які з'яўляецца гарачым прыхільнікам Мілошавіча і гэтак апантана лабіруе ягоныя інтарэсы. Іншая справа, што да Лукашэнкі мала прыслухоўваюцца, нават у Расеі. Калі нядаўна ён быў у Маскве, ельцын заявіў, што яны з Лукашэнкам толькі абмяняюцца думкамі па югаслаўскім пытаньні, і ня больш таго.

Лукашэнка незадаволены пазыцыяй Расеі ў адносінах да Югаславіі, якая прыкметна зьмянілася ад жорсткай да больш разважлівай. Ён лічыць, што Югаславіі трэба аказваць больш дзейсную дапамогу, у тым ліку і палітычную, і маральную.

У пастанове чатыры пункты: падтрымаць рашэньне Скупшчыны аб далучэньні Югаславіі да саюзу Беларусі і Расеі, зьвярнуцца да ўрада і прэзыдэнта, каб тыя разгледзелі ўсе міжнародныя і прававыя асьпекты далучэньня, накіраваць пастанову "палаты прадстаўнікоў" для разгляду парляманцкім сходам саюзу Беларусі і Расеі, а таксама ў "савет рэспублікі" "нацыянальнага сходу" Беларусі.

Магчыма, аднак, што ў хуткім часе прэзыдэнту Лукашэнку і ягоным дэпутатам трэба будзе вырашаць больш складаныя пытаньні. Згодна зьвестак, якія прасочваюцца з расейскіх палітычных колаў, у міратворчым пляне Масквы па ўрэгуляваньні югаслаўскага канфлікту ёсьць і прапановы ўключыць у міратворчыя сілы пад эгідай ААН ня толькі Расею, Украіну, але і Беларусь. А між тым нават "канстытуцыя" 1996 году забараняе выкарыстоўваць беларускіх ваеннаслужачых у "гарачых кропках", і пакуль Лукашэнка заяўляе, што ніколі не пераступіць праз гэта. Але хто ведае, ці ня будзе прыхільнасьць да Слабадана МІлошавіча мацней за канстытуцыю?

XS
SM
MD
LG