Лінкі ўнівэрсальнага доступу

Навіны 08 красавіка 1999 г.


Алег Грузьдзіловіч, Менск

Сёньня беларускія спэцслужбы і праваахоўчыя ворганы сталіцы паднятыя "на ногі". Яны шукаюць былую старшыню Нацбанку Тамару Віньнікаву. Па зьвестках, падцьверджаных у Радзе бясьпекі і пракуратуры краіны, у ноч на 8 красавіка Віньнікава зьнікла са сваёй кватэры на вуліцы Адзінцова, дзе яна ўтрымлівалася пад хатнім арыштам. Паведамляецца, што Віньнікава абвешчаная ў вышук.

У Менску шум вакол зьнікненьня віньнікавай падняўся сёньня раніцай, пасьля таго, як у 9 гадзінаў міліцыянтамі была затрыманая і адвезеная ў пракуратуру краіны на допыіт адвакат Людзьміла Ульляшына, якая аказвала Віньнікавай юрыдычную дапамогу. Допыт адвакаткі працягваўся да сярэдзіны дня, пасьля чаго сьледчыя забралі яе на вобыск у юрыдычную кансультацыю Цэнтральнага раёну Менску. На дадзены момант невядома, ці адпушчаная яна на волю.

Нагадаем, што Віньнікава была арыштаваная ў пачатку 1997 году, па падазрэньні ў крадзяжы дзяржаўнай маёмасьці і службовых злоўжываньнях. Спачатку Віньнікава ўтрымлівалася ў ізалятары КДБ ("амэрыканка"),
а з канца 1997 году фактычна знаходзілася пад хатнім арыштам у сваёй кватэры на вуліцы Адзінцова, дзе яе сьцераглі адразу некалькі супрацоўнікаў спэцслужбаў. Усе кантакты Віньнікавай са сьветам пільна адсочваліся, нават па тэлефоне спачатку адказваў невядомы вартаўнік. .

У прэсу, між тым, неаднаразова траплялі зьвесткі, што Віньнікава вельмі хворая. Адвакаты сьцьвярджалі, што ёй патрэбная тэрміновая апэрацыя. Апошнія два месяцы Віньнікава сапраўды правяла ў вайсковым шпіталі, адкуль выпісалася чатыры дні таму. якраз напярэдадні ў "Беларускай дзелавой газэце" было зьмешчана фактычна першае, пасьля арышту, інтэрвью Віньнікавай. У ім яна паведаміла пра нейкага вельмі ўплывовага чалавека з бліжэйшага атачэньня прэзыдэнта, які, на ейную думку, і стаў галоўнай прычынаю ейных бедаў. Гэты чалавек. па ёйных словах, пасьля ейнага арышту значна абагаціўся.

Ня выключана, што зьнікненьне Віньнікавай неяк зьвязанае зь ейнай смелай заявай у бок свайго недабразычліўцы.

Між тым у заяве, накіраванай у друк, пракуратура Беларусі сёньня сьцьвярджае, што "Віньнікава парушыла ўмовы падпіскі аб нявыезьдзе, бо зразумела, што ёй ня удасца пазьбегнуць пакараньня. У сувязі з гэтым Віньнікавай зьмененая мера ўтрыманьня з падпіскі аб нявыезьдзе на ўтрыманьне пад арыштам. Яна абвешчаная ў рэспубліканскі і міждзяржаўны вышук, у тым ліку і з удзелам Інтэрполу". Далей у заяве сьцьвярджаецца, што пракуратурай і праваахоўчымі ворганамі прадпрымаюцца усе неабходныя меры для розыску і арышту Віньнікавай. Пракуратура просіць грамадзянаў, якія што-небудзь ведаюць пра месца знаходжаньня Віньнікавай, паведамляць гэтыя зьвесткі ў міліцыю. Як удалося былой старшыні нацбанку зьбегчы фактычна з-пад варты - зараз таксама высьвятляецца.

Пакуль пракуратура ніякіх зьвесткак у друк не паведамляе.Між тым, незалежныя крыніцы ставяць пад сумнеў магчымасьць уцячы з кватэры, якая ўвесь час знаходзіцца пад аховай. Былы міністр унутраных справаў Юры Захаранка, у прыватнасьці, не выключае, што Віньнікава магла быць выкрадзеная спэцслужбамі ў нейкіх незаконных мэтах. альбо ёй дапамаглі "дабразычліўцы", якія на самой справе дзейнічаюць супраць яе.

Падобна на тое, што сапраўдную тайну гэтага неверагоднага зьнікненьня ўдасца разгадаць ня хутка.

XS
SM
MD
LG