Навіны 11 студзеня 1999 г.

Як высьветлілася, група грамадзянаў, што наведала Генэральнае консульства Расейскай Фэдэрацыі ў Берасьці, ад імя новастворанага Камітэту Абароны Бацькаўшчыны перадала ў дыпляматычную ўстанову суседняй дзяржавы тэкст заявы, у якім выказваецца рашучы пратэст у сувязі з падпісанай Лукашэнкам і Ельцыным дэклярацыяй аб аб'яднаньні Беларусі й Расеі. Як лічаць сябры дагэтуль невядомай у Берасьці арганізацыі, дзеяньні прэзыдэнта Лукашэнкі падпадаюць пад артыкул 61 крымінальнага кодэксу Рэспублікі Беларусь, а плянаванае правядзеньне ўвесну 1999 году рэфэрэндуму аб беларуска-расейскім аб'яднаньні зьяўляецца спробаю пазьбегнуць адказнасьці.

З апошніх выступаў прэзыдэнта Лукашэнкі Камітэт Абароны Бацькаўшчыны зрабіў выснову, што ўвядзеньне агульнай мытнай прасторы й агульнай валюты азначае ліквідацыю эканамічнай незалежнасьці Беларусі, а супольная ахова дзяржаўнай мяжы Рэспублікі Беларусь зьяўляецца падставаю для ўвядзеньня на тэрыторыю Беларусі акупацыйнага расейскага войска. Заканчваецца заява на імя генэральнага консула консульства Расейскай Фэдэрацыі ў Берасьці наступнаю фразаю: "Камітэт Абароны Бацькаўшчыны не дапусьціць акупацыі й калянізацыі Беларусі".

Як удалося даведацца, вышэй названы Камітэт Абароны Бацькаўшчыны паўстаў у Берасьці адразу пасьля падпісаньня прэзыдэнтамі Расеі й Беларусі маскоўскіх пагадненьняў у сьнежні мінулага году. Ініцыятары стварэньня гэтага камітэту заяўляюць, што і надалей будуць прыцягваць увагу грамадзкасьці да дзейнасьці беларускіх уладаў у так званым інтэграцыйным рэчышчы.

Што да расейскага консульства ў Берасьці, дык яно ўжо другі раз за апошнія дні трапляе ў поле зроку журналістаў. Нагадаю, што 29 сьнежня ў гэтую дыпляматычную ўстанову быў ананімна дастаўлены пахавальны вянок с жалобнаю стужкаю, на якой было напісана "Вечная памяць дружбе Расеі й Беларусі", таму відаць і сёньняшняя падзея ніяк не спрыяла ўзняцьцю настрою расейскага консула ды ягоных падначаленых.