Адразу па вяртаньні ў Менск дэлегацыя ад апазыцыі,
якая брала ўдзел у паседжаньнях Парлямэнцкай асамблеі Рады Эўропы, падвяла
вынікі свайго візыту ў Страсбург.
На сустрэчы з журналістамі члены дэлегацыі беларускай апазыцыі Анатоль
Лябедзька й Яраслаў Раманчук не хавалі свайго задавальненьня ад вынікаў
сэсіі Парлямэнцкай асамблеі Рады Эўропы.
Пра гэта заявіў лідэр Аб’яднанай грамадзянскай партыі Анатоль Лябедзька:
(Лябедзька: ) "Мы ставілі некалькі задачаў сабе. Па-першае, не дапусьціць
легітымізацыі вынікаў выбараў у Палату прадстаўнікоў і ў Палату № 2. Па-другое,
зафіксаваць стаўленьне Парлямэнцкай асамблеі Рады Эўропы да сытуацыі ў
Беларусі ў дакумэнтах.
Па-трэцяе, як мага шырэй паінфармаваць структуры Парлямэнцкай асамблеі
й Рады Эўропы (самой Рады Эўропы і нацыянальных парлямэнцкіх дэлегацыяў)
пра сытуацыю ў Беларусі й пэрспэктывах ейнага разьвіцьця. Мы вельмі задаволеныя,
бо наша праграма выкананая, мэты й задачы дасягнутыя практычна на 100%".
Спадар Лябедзька адзначыў, што пасьля разгляду беларускага пытаньня
афіцыйная дэлегацыя была расчараваная, і цяпер на пэрспэктывы легітымізацыі
на Захадзе гэтак званай Палаты прадстаўнікоў глядзіць без аптымізму.
Эўрапейскія парлямэнтары недвухсэнсоўна заявілі, што пытаньне прызнаньня
імі Нацыянальнага сходу можа быць разгледжана толькі ў выпадку правядзеньня
ў Беларусі свабодных і дэмакратычных прэзыдэнцкіх выбараў.
Сёньня сябры дэлегацыі распаўсюдзілі неафіцыйны пераклад рэзалюцыі “Аб
сытуацыі ў Беларусі”, ухваленай трыма фракцыямі Парлямэнцкай асамблеі Рады
Эўропы. З тэксту дакумэнту вынікае, што міжнародныя структуры будуць працягваць
назіраньне за разьвіцьцём сытуацыі ў Беларусі.
Эўрапейскія парлямэнтары заклікаюць улады Беларусі “зрабіць усё магчымае
дзеля правядзеньня адкрытых, дэмакратычных выбараў, арганізацыі кампаніі
назіраньня, ухваленьня выбарчага заканадаўства, якое б адпавядала міжнародным
стандартам”.
На пачатку сакавіка краіну наведае гэтак званая Эўратройка, каб прааналізаваць
сытуацыю ў Беларусі напярэдадні прэзыдэнцкіх выбараў. Анатоль Лябедзька
паведаміў журналістам, што на адну з сваіх наступных сэсіяў, а гэта хутчэй
за ўсё будзе ў красавіку ці ліпені, Парлямэнцкая асамблея Рады Эўропы мае
запрасіць для выступу прадстаўнікоў кандыдатаў на прэзыдэнта.
Ягор Маёрчык, Менск
Самае папулярнае
1