Згодна з новым Крымінальным кодэксам, беларускія мэдыкі
нясуць крымінальную адказнасьць за неаказаную мэдычную дапамогу ці ейную
неадпаведнасьць. У пэўных выпадках мэдыкі могуць трапіць за краты на 2,
3 альбо 5 гадоў.
Новы Крымінальны кодэкс, які дзее з 1 студзеня, пры пэўных абставінах
можа адправіць беларускіх мэдыкаў за краты.
Прыкладам, за неаказаньне мэдычнай дапамогі без паважнай прычыны лекараў
могуць караць пазбаўленьнем волі да 2 гадоў. За дзеяньні ж, што прывялі
да сьмерці хворага ці да цяжкага цялеснага пашкоджаньня, можна атрымаць
3 гады зьняволеньня.
Існуе цяпер крымінальная адказнасьць за неадпаведнае выкананьне прафэсійных
абавязкаў. Калі з гэтай прычыны хворы атрымаў цяжкія ды менш цяжкія цялесныя
пашкоджаньні, дык вінаватаму лекару могуць даць штраф, пазбавіць яго права
займацца мэдычнай практыкай, прысудзіць да папраўчых працаў на 2 гады ці
пазбавіць волі да 3 гадоў.
Калі хворы памрэ альбо будзе інфікаваны СНІДам, вінаваты лекар можа
трапіць за краты ажно на 5 гадоў.
Большасьць беларускіх мэдыкаў абураныя гэтай навацыяй у Крымінальным
кодэксе. Свой пункт гледжаньня выказвае вядучы навуковы супрацоўнік НДІ
анкалёгіі і мэдыцынскай радыёлёгіі Павал Маісееў:
(Маісееў: ) "Калі такія артыкулы ёсьць, дык мусяць быць іншыя — пра
абарону таго ж лекара. Перш чым ўводзіць гэткія артыкулы, ды яшчэ з гэткімі
тэрмінамі зьняволеньня, павінны быць нейкія ўмовы для працы лекара. Лекар
мусіць мець адпаведнае абсталяваньне, лекі ўсе патрэбныя і нядрэнны заробак.
Кожны лекар мае права на памылку, гэтак так, але я ня ведаю такіх лекараў,
якія б ставілі за мэту загубіць хворага. Я разумею пачуцьці сваякоў, родных,
знаёмых, калі надараецца сьмерць ці яшчэ што. Яны ў адчаі могуць напісаць
што заўгодна. Тады лекар робіцца безабаронным".
На думку П.Маісеева, зьмены ў кодэксе — спроба зрабіць выгляд, што ў
мэдыцыне наводзіцца парадак. А паводле дырэктара Інстытуту нэйралёгіі,
нэйрахірургіі і фізыятэрапіі Арнольда Сьмеяновіча, такія захады наогул
небясьпечныя.
(Сьмеяновіч: ) "Можна згубіць усіх лекараў ды застацца ўвогуле без мэдыкаў.
Бо ў новым кодэксе прадугледжаная адказнасьць за тое, што можа надарыцца
з пацыентам пасьля лекарскага агляду.
А тут могуць быць любыя ўскладненьні, бо цяпер мэдыкі ня маюць сучаснага
абсталяваньня для поўнага дасьледаваньня, каб усё прадугледзець. Тут шмат
яшчэ чаго незразумелага".
На думку загадчыцы 1-м нэўралягічным аддзяленьнем 9 клінічнай больніцы
Вольгі Бузуевай, лекарам не патрэбныя пагрозы, каб сьвядома выконваць свае
прафэсійныя абавязкі.
(Бузуева: ) "Лекар заўжды адчувае маральную адказнасьць перад пацыентам,
і ніякі Крымінальны кодэкс ня можа гэтага замяніць. Я ды многія мае калегі
ўспрынялі гэтую навацыю зь вялікім незадавальненьнем, таму што гэтыя артыкулы
напісаныя так, што ў любой сытуацыі можна абвінаваціць лекара".
Дарэчы, беларускім лекарам дагэтуль няясна: калі нешта здарыцца, хто
будзе вызначаць — адпаведна ці неадпаведна яны выконвалі свае прафэсійныя
абавязкі? Бо ў новым кодэксе гэта не пазначана. А ў юрыдычным аддзеле Міністэрства
аховы здароўя пакуль не бяруцца камэнтаваць гэтай вельмі істотнайакалічнасьці.
Ганна Соусь, Менск
Самае папулярнае
1