Аб'яднаная Грамадзянская Партыя Беларусі атрымала
статус сталага назіральніка ў Эўрапейскім Дэмакратычным Зьвязе — уплывовай
палітычнай арганізацыі, што аб'ядноўвае правацэнтрысцкія партыі Эўропы.
АГП стала першай партыяй з краінаў СНД, якая здолела атрымаць такі статус.
Статус сталага назіральніка пры Эўрапейскім Дэмакратычным Зьвязе быў
нададзены Грамадзянскай Партыі некалькі дзён таму ў Бэрліне, дзе праходзіла
канфэрэнцыя гэтай арганізацыі.
АГП на бэрлінскай канфэрэнцыі прадстаўлялі старшыня партыі Анатоль Лябедзька
й ягоны намесьнік Яраслаў Раманчук. Лідэры Аб'яднанай Грамадзянскай Партыі
сустрэліся ў Бэрліне з уплывовымі эўрапейскімі палітыкамі: былым канцлерам
Нямеччыны Гельмутам Колем, цяперашняй старшынёй нямецкага Хрысьціянска-
дэмакратычнага саюзу Ангелай Мэркель, лідэрам партыі брытанскіх кансэрватараў
Уільямам Хэйгам, былым прэм'ер-міністрам Італіі Сыльвіё Бэрлюсконі, цяперашнім
кіраўніком ураду Эстоніі Мартам Лаарам ды зь іншымі.
Як вынік гэтых сустэчаў, спадарыня Мэркель паабяцала спадарам Лябедзьку
й Раманчуку наладзіць больш шчыльнае супрацоўніцтва паміж нямецкімі хрысьціянскімі
дэмакратамі ды прадстаўнікамі беларускай апазыцыі.
А Гельмут Коль, паводле Анатоля Лябедзькі, выказваў асаблівую занепакоенасьць
сытуацыяй у Беларусі напярэдадні прэзыдэнцкіх выбараў. Тое, што Аб'яднаную
Грамадзянскую Партыю Беларусі запрасілі ў гэты ўплывовы палітычны клюб,
ейны лідэр лічыць вялікім дасягненьнем дэмакратычных сілаў Беларусі.
Гаворыць Анатоль Лябедзька:
(Лябедзька: ) "Найгалоўнейшы вынік — тое, што дачыненьні з эўрапейскімі
цэнтрысцкімі ды правацэнтрысцкімі партыямі маюць грунтоўную прававую базу.
Мы — сталыя назіральнікі ў Эўрапейскім Дэмакратычным Зьвязе, гэта "парасонавая"
арганізацыя, шгто аб'ядноўвае ў сваіх шэрагах правацэнтрысцкія партыі.
Гэта дае мажлівасьць нам зараз працаваць значна больш эфэктыўна.
Напярэдадні прэзыдэнцкіх выбараў, натуральна, гэта для нас вельмі моцная
падтрымка, і маральная, і палітычная".
Лідэр Аб'яднанай Грамадзянскай Партыі таксама выступіў з прамовай перад
эўрапейскімі палітыкамі. Анатоль Лябедзька заклікаў лідэраў правацэнтрысцкіх
партыяў Эўропы больш актыўна падтрымліваць дэмакратычную апазыцыю ў Беларусі,
а таксама актывізаваць міжпарлямэнцкія кантакты з дэпутатамі Вярхоўнага
Савету ў рамках АБСЭ, Рады Эўропы ды іншых міжнародных структураў.
Прадстаўнікі эўрапейскіх правых партыяў прысьвяцілі сытуацыі ў Беларусі
цэлы абзац гэтак званае бэрлінскае дэклярацыі. Эўрапейскія палітыкі будуць
больш актыўна патрабаваць ад уладаў Беларусі хутчэйшага вызваленьня Андрэя
Клімава й Уладзімера Кудзінава, а таксама актыўна падтрымліваць АГП і яе
партнэраў па дэмакратычнай кааліцыі.
Канкрэтныя праекты дапамогі эўрапейскіх партыяў прадстаўнікам беларускай
апазыцыі будуць абмеркаваныя на пачатку вясны падчас візыту ў Менск дэлегацыі
Эўрапейскага Дэмакратычнага Зьвязу.
Альгерд Невяроўскі. Менск
Самае папулярнае
1