Лінкі ўнівэрсальнага доступу

Сёньня


Мечыслаў Грыб, былы старшыня Вярхоўнага Савету, трапіў у аўтамабільную аварыю. Аўтамабіль, якім ехаў М.Грыб, перакуліўся на шашы непадалёк ад Лагойску. Усе ўдзельнікі здарэньня атрымалі нязначныя цялесныя пашкоджаньні.

Экс-старшыня Вярхоўнага Савету Мечыслаў Грыб, а таксама прэзыдэнт Фонду імя Лява Сапегі Міраслаў Кобаса трапілі ў аўтамабільную аварыю. Яны вярталіся мінулай пятніцай зь Віцебску, з паседжаньня Каардынацыйнай рады мясцовых дэмакратычных арганізацыяў.

Аварыя адбылася непадалёк ад Лагойску. Аўтамабіль "Опэль", якім ехалі Грыб ды Кобаса (кіраваў іхны знаёмы) занесла ў кювэт, дзе аўтамабіль перакуліўся. Усе трох атрымалі нязначныя цялесныя пашкоджаньні.

М.Грыбу пашкодзіла нагу, але сёньня, паводле ягоных словаў, ён пачуваецца добра. Экс-старшыня Вярхоўнага Савету нават не зьвяртаўся па дапамогу лекараў.

М.Грыб прычынай інцыдэнту лічыць галалёд ды тое, што кіроўца ня справіўся з кіраваньнем з-за цяжкіх умоваў надвор'я. Спробу дывэрсіі экс-старшыня Вярхоўнага Савету выключае. Паводле спадара Грыба, дзяржаўная аўтаінспэкцыя ведае пра здарэньне, і там трымаюцца гэткага ж меркаваньня пра ягоныя прычыны.

М.Грыб ажно трэці раз за жыцьцё трапляе ў аўтамабільную аварыю. Першы раз тое здарылася ў сярэдзіне 1950-х гадоў пад Днепрапятроўскам. Тады перакуліўся бартавы аўтамабіль, у кузаве якога на ўборку ўраджаю ехалі курсанты пажарнай вучэльні, разам з М.Грыбам. Як вынік, некалькі чалавек атрымалі дужа цяжкія траўмы, але будучы кіраўнік беларускага парлямэнту — толькі некалькі драпінаў.

Другое здарэньне было ў 1960 годзе ля пасёлку Пліса Віцебскай вобласьці ды мела больш сур'ёзны вынік — Грыб трапіў у шпіталь з траўмай рукі.

З дэпутатаў Вярхоўнага Савету, а таксама цяперашняга непрызнанага Нацыянальнага сходу шмат хто трапляў у здарэньні на дарогах. Статыстыка апошніх двух гадоў выдзяляе з гэтых здарэньняў трагічныя.

На жаль, сьмерцю завершыліся аўтааварыі для кіраўніка Пастаўскага райвыканкаму Анатоля Чэпіка і дырэктара піўзаводу "Аліварыя" Тамары Дудко. Асноўнай прычынай гэтых аварыяў таксама называлі перавышэньне хуткасьці ды дрэнныя ўмовы надвор'я.

Алег Грузьдзіловіч, Менск

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG