У Беларусі пачаўся збор подпісаў пад ініцыятыўнай
заявай пра стварэньне шырокай грамадзянскай кааліцыі пад назовам "У ХХІ
стагодзьдзе — з новым прэзыдэнтам".
Ініцыятыва зыходзіць ад грамадзянскага камітэту "Выбары-2001", сустаршыні
якога — Васіль Шлындзікаў і Генадзь Грушавы. Але паколькі гэты камітэт
у Міністэрстве юстыцыі афіцыйна не зарэгістраваны, ініцыятарамі прапановы
выступае як бы група асобаў, сярод якіх дэпутат ВС Беларусі 13 скліканьня
Ўладзімер Нісьцюк.
Сп.Нісьцюк камэнтуе неабходнасьць стварэньня кааліцыі "У ХХІ стагодзьдзе
— з новым прэзыдэнтам":
(Нісьцюк: ) "Побач з тымі структурамі, якія афіцыйна ўжо існуюць у Беларусі
— Кансультатыўны савет апазыцыйных партыяў, Каардынацыйная рада дэмакратычных
сілаў, апошнім часам зьявілася шмат і грамадзянскіх ініцыятываў. Гэта ініцыятыва
"Выбары-2001", гэта ініцыятыва кандыдатаў у дэпутаты Палаты прадстаўнікоў,
якіх улада не дапусьціла ды выбараў ці не дала ім абрацца, таксама ініцыятыва
моладзі "Пераменаў!" — шмат грамадзянскіх ініцыятываў, вартых увагі.
Актывізавалася прафсаюзная плынь у Беларусі, якая рыхтуецца да прэзыдэнцкіх
выбараў. Ідзе дынамічная падрыхтоўка да вялікай палітычнай акцыі, якая
завецца "Прэзыдэнцкія выбары-2001", — распавядае сп. Нісьцюк.
Заява падкрэсьлівае, што выйсьце з галечы для насельніцтва Беларусі
— канстытуцыйная зьмена палітычнай улады. А наступныя прэзыдэнцкія выбары
якраз і даюць гэткую магчымасьць.
Да кааліцыі запрашаюцца ўсе, каму неабыякавы лёс краіны і хто гатовы
дапамагчы забясьпечыць перамогу на прэзыдэнцкіх выбарах адзінага дэмакратычнага
кандыдата.
Я папрасіў Уладзімера Нісьцюка патлумачыць розьніцу паміж заклікамі
Каардынацыйнай рады дэмакратычных сілаў пра вылучэньне адзінага кандыдата
і пазыцыяй шырокай грамадзянскай каліцыі. Вось што гаворыць мой суразмоўца:
(Нісьцюк: ) "Цяпер існуе дзьве канцэпцыі, якія вылучаюць розныя сілы.
Першая канцэпцыя, якая ўжо амаль што прадстаўленая і рэалізуецца, — гэта
канцэпцыя групы партыяў і структураў, якія ўваходзяць у Каардынацыйную
раду дэмакратычных сілаў.
Канцэпцыя мяркуе абраньне цяпер адзінага кандыдата, каб усе кандыдаты
патэнцыйныя, якія зьбіраюцца на выбары, далучыліся да яго, увайшлі ў ягоную
каманду, усе свае патэнцыялы, і матэрыяльныя ў тым ліку, аб'ядналі ды вялі
адзінага кандыдата.
Існуе ініцыятыва другая. Згодна зь ёй, на рэгістрацыю ідзе некалькі
кандыдатаў, і трэба паглядзець, каб гэтыя кандыдаты дамовіліся паміж сабою
— ужо больш менавіта яны між сабою, а ня людзі зь іхнага атачэньня. Таму
што некаторыя з гэтых кандыдатаў на палітычныя партыі абапірацца ўвогуле
ня будуць — яны будуць ісьці як незалежныя беспартыйныя кандыдаты, яны
маюць свой электарат, свае каманды. І тое, што палітычныя партыі вырашаць
сёньня, для іх ня будзе абавязковым", — паведамляе адзін з ініцыятараў
стварэньня шырокай грамадзянскай кааліцыі Ўладзімер Нісьцюк.
І яшчэ адна цікавая дэталь — тэхнічнага пляну. Калі заклікі ў падтрымку
"Хартыі-97" падпісваліся на адным аркушы некалькімі дзясяткамі асобаў,
дык кожны падпісант новай ініцыятывы атрымлівае толькі адзін асобнік заявы.
Уладзімер Глод, Менск
Самае папулярнае
1