Гарадзенскія ўлады рыхтуюцца адзначыць 200-годзьдзе заснаваньня Гарадзенскай
губэрні расейскім царом Аляксандрам І. На сьвяткаваньні ўпершыню за доўгі
час будзе выкарыстоўвацца губэрнскі герб.
Аргкамітэт сьвята, якое адбудзецца ў верасьні, узначальвае сам Аляксандар
Дубко, старшыня аблвыканкаму. Пасьля апошняга паседжаньня камітэту ў некаторых
сродках масавай інфармацыі зьявіліся паведамленьні пра тое, што ўлады быццам
бы намерваюцца замяніць герб Горадні з аленем Сьв.Губэрта на шчыце на герб
Гарадзенскай губэрні.
Такое ўжо было — за савецкім часам нават на цыгарэтах "Гродна" выкарыстоўваўся
менавіта губэрнскі геральдычны зубар, а не алень.
Адзін з удзельнікаў аргкамітэту, Уладзімер Амелька, які ўзначальвае
ўпраўленьне грамадзка-палітычнай інфармацыі аблвыканкаму, паведаміў мне,
што гісторыкам далі заданьне высьветліць, які герб лепей прыдасца пры сьвяткаваньні
губэрнскіх угодкаў — першы ці пазьнейшы. Гарадзкі ж герб чапаць ніхто не
зьбіраецца, кажа сп.Амелька.
Пікантнасьць сытуацыі ў тым, што нават цар зацьвердзіў герб губэрні,
крамольны для сёньняшняй улады. Верхнюю ягоную частку займала "Пагоня",
пад якой быў намаляваны зубар. Толькі па забароне дзеяньня Статуту Вялікага
Княства Літоўскага ў гербе губэрні ў 1845 годзе пакінулі толькі зубра,
якога пазьней замянілі на быка. Такім чынам, герб з "Пагоняй" праіснаваў
больш за 40 гадоў.
Гарадзенскі гісторык Алесь Смалянчук пра намер уладаў сказаў мне наступнае:
"Крыўдна, што гэткая значнасьць надаецца падобным угодкам, ды нашу гісторыю
зноў выводзяць з расейскай. У нашай мінуўшчыне былі значна больш важныя
падзеі, чымся стварэньне губэрняў.
Напрыклад, пры Стэфане Баторам Горадня была фактычна сталіцай вялікай
краіны — Рэчы Паспалітай. Існаваў праект афіцыйнага яе пераносу з Кракаву,
і каб не раптоўная сьмерць караля, які памёр у нашым горадзе, гэтая задума
магла ажыцьцявіцца".
Сяргей Астраўцоў, Горадня
Самае папулярнае
1