Уначы з 5 на 6 студзеня ў адной з віцебскіх турмаў адбыўся стыхійны
бунт зьняволеных, які на наступны дзень быў падаўлены АМОНам.
Стыхійныя масавыя пратэсты распачаліся ў віцебскай папраўчай калёніі
непаўнагадовых, вядомай пад назвай ВТК-1, а 19 гадзіне 5-га студзеня. Штуршком
для пратэсту сталіся наступныя падзеі.
Адзін зь непаўнагадовых выхаванцаў шостага атраду паліў у недазволеным
месцы. За гэта ён ды яшчэ двое непаўнагадовых былі выкліканыя ў адміністрацыю
дзеля размовы, аднак астатнія выхаванцы вырашылі, што іх павялі адразу
ў дысцыплінарны ізалятар, дзе на той час ужо ўтрымліваліся двое пакараных
падлеткаў. Стыхійнае незадавальненьне ў атрадзе вырасла да крытычнай мяжы.
Нават калі ўсіх трох выхаванцаў пасьля тлумачальнай гутаркі вярнулі ў атрад,
насьпелы бунт спыніць ужо было немагчыма.
219 выхаванцаў шостага атраду зачыніліся на другім паверсе, забарыкадавалі
дзьверы, выбілі шыбы ды пачалі патрабаваць вызваленьня з карцару двух пакараных.
Потым падлеткі падпалілі мэблю ды асабістыя рэчы, і адміністрацыі давялося
выклікаць ужо ня толькі міліцыянтаў ды АМОН, але яшчэ і пажарнікаў.
Уясго ў ліквідацыі беспарадкаў прымалі ўдзел 299 чалавек. Супрацьстаяньне
доўжылася ўсю ноч, і спыніць бунт удалося толькі раніцай 6 студзеня. Вынікі
гэтай падзеі наступныя: адзін з міліцыянтаў зьмешчаны ў шпіталь з траўмаю
галавы, 42 выхаванцы шостага атраду зьмешчаныя ў сьледчы ізалятар, 49 выхаванцаў
разьмеркаваныя па іншых віцебскіх калёніях, памяшканьні аднаго з будынкаў
калёніі вымагаюць капітальнага рамонту, а ва ўсёй калёніі абвешчанае цяпер
надзвычайнае становішча. Па факце масавага парушэньня рэжыму вядзецца сьледзтва,
прычыны бунту вывучаюцца, ужо выяўлена 9 ягоных непаўнагадовых ініцыятараў.
Як паведаміў карэспандэнту Радыё Свабода адзін з віцебскіх супрацоўнікаў
МЧС, гэты бунт лічыцца сёньня выключным выпадкам. Апошні раз падобныя падзеі
адбываліся ў Віцебску больш як 10 год таму.
Браніслава Станкевіч, Віцебск
Самае папулярнае
1