Сябры Кансэрватыўна-Хрысьціянскае партыі БНФ пікетавалі офіс КНГ АБСЭ
ў Менску ды перадалі супрацоўнікам групы заяву з патрабаваньнем адстаўкі
кіраўніка КНГ Ганса-Георга Віка.
Дваццаць сяброў Кансэрватыўна-Хрысьціянскае партыі БНФ прыблізна паўгадзіны
пікетавалі памяшканьні КНГ АБСЭ ў Менску на праспэкце газэты “Правда”.
Хаця гэтая імпрэза была несанкцыянаванаю, бо гарадзкія ўлады накіроўвалі
арганізатараў на пляц Бангалор, ніводнага міліцыянта ў навакольлі не было.
Ніхто з удзельнікаў пікету ня быў затрыманы.
Акцыя пачалася з разгортваньня бел-чырвона-белых сьцягоў ды двух плякатаў
з наступнымі надпісамі: “Палітыка КНГ АБСЭ ў Беларусі — гэта палітыка падтрымкі
дыктатарскага рэжыму Лукашэнкі” і “Патрабуем адстаўкі спадара Віка”.
Я спытаў удзельнікаў пікетаваньня: што прывяло іх да офісу КНГ АБСЭ?
(Пянькоўская: ) “Мы вельмі незадаволеныя дзейнасьцю спадара Віка, вельмі
незадаволеныя. Мы змагаемся за незалежнасьць Беларусі, а за што ён змагаецца,
я ня ведаю. Усе тыя намаганьні, якія яны прыкладалі з гэтай аб’яднанай
апазыцыяй, не далі ніякіх вынікаў. Потым гэтыя стасункі з расейскімі імпэрыялістамі,
такімі як Селязьнёў. Гэта нам таксама не падабаецца. Завуць мяне Пянькоўская
Лідзія”.
А вось меркаваньне Ўладзімера Юхо:
(Юхо: ) “Мы выйшлі выказаць сваё “фі” спадару Гансу Віку за яго цалкам
прарасейскую пазыцыю ў адносінах да выбараў, да лёсу Беларусі. Адна з суполак
Маскоўскага раёну выступіла з гэтай ініцыятывай, бо яны якраз тут і жывуцць”.
Гэта быў сябра КХП БНФ спадар Юхо. Неўзабаве да пікетоўцаў выйшаў супрацоўнік
групы АБСЭ ў Менску Эндру Карпэнтэр, бо ані спадара Віка, ані ягонага намесьніка,
як паведамілі ў офісе КНГ, на момант пікетаваньня там не было. Адзін зь
лідэраў КХП Сяргей Папкоў перадаў спадару Карпэнтэру заяву й патлумачыў
ейны зьмест:
(Папкоў: ) “Мы пацьвярджаем сваю пазыцыю, што мы ня згодныя з палітыкай
КНГ АБСЭ. Яна, фактычна, дапамагае стварыць ілюзію дэмакратыі ў Беларусі
перд выбарчым фарсам. Таму мы патрабуем ад АБСЭ, каб палітыка АБСЭ ў Менску
была зьмененая, і патрабуем адстаўкі спадара Віка”.
(Карпэнтэр: ) “Вялікі дзякуй за тое, што Вы выказалі нам сваю пазыцыю.
Я перадам гэтую інфармацыю спадару Віку”.
Сказаў супрацоўнік КНГ АБСЭ ў Менску Эндру Карпэнтэр, атрымаўшы пэтыцыю
ад спадара Папкова. Спадар Карпэнтэр адмовіўся адказаць на пытаньне, дзе
зараз знаходзіцца Ганс-Георг Вік, а супрацоўніца ягонага офісу параіла
зьвяртацца па камэнтар толькі ў панядзелак.
Юры Сьвірко, Менск
Самае папулярнае
1