Ужо месяц у Барысаве доўжыцца канфлікт між адміністрацыяй
сярэдняе школы №7 і бацькамі вучняў гэтае школы. Бацькі скардзяцца, што
дырэкцыя ды бацькоўскі камітэт прымушаюць іх аплочваць тыя патрэбы школы,
якія мусіць фінансаваць дзяржава.
1 верасьня сын спадарыні Тамары дый іншыя дзеці, вярнуўшыся дадому пасьля
заняткаў у школе №7, моцна зьдзівілі сваіх бацькоў.
“Першага верасьня на кляснай гадзіне сказалі дзецям, каб для набыцьця
ксэракса прынесьлі па чатыры тысячы рублёў… Ну бацькі… — па-першае, ня
кожны можа даць гэту суму. Як у мяне напрыклад, заробкавая плата 13 тысячаў
за месяц. І аддай — чатыры. Гэта, акрамя таго, што яшчэ на рамонт школы,
на рамонт клясы… Настаўнікам на падарункі да Дня настаўніка ўжо аддалі
па пяцьсот рублёў”, — паведаміла мне спадарыня Тамара.
Яшчэ адна мая суразмоўніца зь ліку бацькоў, спадарыня Ніна, сказала:
“Пакуль я ня дам. У меня няма чаго даць”.
Паводле вядомых прычынаў, абедзьве жанчыны не пажадалі назваць у эфіры
свае прозьвішчы.
Дырэктарка школы №7 Ніла Цімохава патлумачыла мне, што неабходнасьць
у бацькоўскіх ахвяраваньнях абумоўленая цяжкай эканамічнай сытуацыяй, у
якой знаходзіцца цяпер школьная адукацыя. А па-другое, гэтыя грошы школа
з бацькоў возьме не адразу:
“Было запрапанавана па адной тысячы за чвэрць з вучня. З улікам, што
гэтыя грошы пойдуць ня толькі на ксэракс, але й на падрыхтоўку да новага
навучальнага году. Я казала на бацькоўскім сходзе, што гэта толькі дабрахвотны
ўнёсак», — падкрэсьліла дырэктарка школы.
Аднак тая ж спадарыня Тамара не пацьвердзіла, што выконваецца прынцып
дабрахвотнасьці. Вось што яна распавяла пра настаўнікаў школы №7:
«Паабяцалі, што: «…Дзеці, у вас кантрольныя, у некаторых — экзамены».
Папярэдзілі, што дабром гэта ня скончыцца», — паведаміла спадарыня Тамара.
Як жа рэагуюць на падобныя грашовыя зборы ворганы адукацыі? Вось меркаваньне
кіраўніка ўправы адукацыі Менскага абласнога выканкаму Георгія Нікановіча:
«Тое, што з бацькоў зьбіраюць грошы, гэта вельмі няслушна, гэта не павінна
быць… Мы з гэтым пытаньнем разьбярэмся абавязкова і, я думаю, паправім
дырэктара», — сказаў спадар Нікановіч і зазначыў, што бюджэтных грошай
мусіць хапаць школе №7 на ўсе ейныя патрэбы.
Алесь Мікалайчанка, Барысаў
Самае папулярнае
1