Югаслаўская апазыцыя абвінавачвае рэжым прэзыдэнта Слабадана Мілошавіча
ў фальсыфікацыі вынікаў прэзыдэнцкіх выбараў і заклікае сваіх прыхільнікаў
пачаць кампанію грамадзянскага непадпарадкаваньня. Але ці здолее яна пераканаць
Мілошавіча саступіць? З падрабязнасьцямі апошніх падзеяў у Югаславіі на
падставе інфармацыі газэты New York Times – Мікола Іваноў.
Сэрбская апазыцыя лічыць, што ў краіне абраны новы прэзыдэнт – лідэр
Сэрбскай Дэмакратычнай партыі – Ваіслаў Каштуніца. Але застаецца тэхнічная
праблема: якім чынам змусіць цяперашняга прэзыдэнта Слабадана Мілошавіча
адмовіцца ад улады. Так камэнтуе апошнія падзеі ў Югаславіі амэрыканская
газэта New York Times.
Зоран Джынджыч, кіраўнік прэзыдэнцкай перадвыбарчай кампаніі Каштуніцы
і адзін з галоўных лідэраў апазыцыі, паведаміў, што апазыцыя плянуе заклікаць
да байкоту заняткаў у школах і ўнівэрсытэтах, да закрыцьця тэатраў і кіно
і да шырокамаштабнага нявыхаду на працу дзяржаўных служачых.
Ваіслаў Каштуніца адмаўляецца ўдзельнічаць у другім туры выбараў таму,
што свой магчымы ўдзел ён разглядае ў якасьці прызнаньня сфальсыфікаваных
выбараў сапраўднымі. Зарко Корач, лідэр адной з 18 партыяў антыўрадавай
кааліцыі, пракамэнтаваў дылему, якая стаіць перад Каштуніцай наступным
чынам: “Мы ведаем, што гэта вельмі рызыкоўная гульня. Але мы ведаем, што
ў нас няма альтэрнатывы. Фальсыфікуючы вынікі падліку галасоў, Мілошавіч,
бясспрэчна, робіць нам выклік. Ён вывеў нас на вуліцы, і мы павінны пагадзіцца
з гэтым. Мілошавіч абвесьціў нам вайну. Мы пачынаем заўтра, і мы паглядзім,
чым усё гэта скончыцца і як далёка нам трэба будзе ісьці.”
56-гадовага юрыста Ваіслава Каштуніцу, які, паводле інфармацыі апазыцыі,
павінен стаць новым прэзыдэнтам Югаславіі, міжнародныя палітычныя аглядальнікі
характарызуюць як памяркоўнага сэрбскага нацыяналіста.
“Для мяне нацыяналізм, – сцвярджае Каштуніца, – гэта нармальны стан
духа, пачуцьцё зьяўляцца адным з тых, хто належыць да нацыі”.
Падчас сваёй перадвыбарчай кампаніі ён на малым аўтобусе падарожнічаў
па ўсёй Сэрбіі і выступаў з вострай крытыкай палітыкі Слабадана Мілошавіча
з пазыцыяў памяркоўнага нацыяналізму. Каштуніца сьцьвярджае, што Мілошавіч
здрадзіў спраўдныя інтарэсы сэрбскага народу.
Каштуніца – чалавек, які верыць у Бога. Ён даволі часта прыгадваў Бога
падчас сваіх перадвыбарчых прамоваў. Ён паходзіць з буржуазнай сям’і з
глыбокімі антыкамуністычнымі традыцыямі.
Каштуніца – былы прафэсар права Бялградзкага ўнівэрсытэту, якога камуністы
звольнілі з працы за палітычныя погляды ў 1974 годзе. Пасьля ж краху югаслаўскага
камунізму ў 1989 годзе ён не прыняў прапанову новых уладаў зноў заняць
прафэсарскую кафэдру. Замест гэтага ён пачаў палітычную дзейнасьць.
Сваю перадвыбарчую прэзыдэнцкую кампанію Каштуніца праводзіў пад лёзунгам:
“Можна быць сэрбскім патрыётам і адначасна выступаць супраць Слабадана
Мілошавіча”.
Каштуніца выступае з вострай крытыкай Міжнароднага Гаагскага трыбуналу
ў справе ваенных злачынстваў на тэрыторыі былой Югаславіі. Ён разглядае
яго ў якасьці інструмэнта амэрыканскай замежнай палітыкі, а не міжнароднага
права. Каштуніца асудзіў адмову трыбуналу насуперак пункту гледжаньня Арганізацыяў
Amnesty International i Human Rights Watch разгледзець магчымыя злачынствы
лідэраў краінаў НАТА падчас бамбаваньня цывільных аб’ектаў на тэрыторыі
Югаславіі.
Каштуніца сьцьвярджае, што ён ніколі не перадасьць Гаагскаму трыбуналу
Слабадана Мілошавіча і іншых кіраўнікоў Югаславіі, абвінавачаных у ваенных
злачынствах. Ён, аднак, не ўдакладняе, ці падобнае ягонае стаўленьне распаўсюджваецца
на Радавана Караджыча, Радко Младзіча і іншых басьнійскіх сэрбаў, абвінавачаных
у злачынствах.
Падчас басьнійскай вайны 1992-95 гг. Каштуніца, як і бальшыня сэрбаў,
падтрымліваў права басьнійскіх сэрбаў далучыцца да Югаславіі, а ня жыць
пад кіраваньнем мусульмана-харвацкага ўраду.
Але нацыяналізм Каштуніцы мае даволі прагматычны характар. У справе
Косава ён сьцьвярджае: “Тыя, хто думае, што сэрбскі народ як нацыя ня можа
існаваць без Косава, памыляюцца. Косава – гэта як Ерузалім, адна з праблемаў,
якія ня маюць рэальнага вырашэньня. Нават, калі амэрыканцы і мяркуюць,
што кожную праблему можна вырашыць”.
Каштуніца – актыўны і пасьлядоўны прыхільнік законнасьці, незалежнасьці
судовай сыстэмы, свабоды слова і сходаў, незалежнасьці заканадаўчай і выканаўчай
уладаў. У гэтым можна пераканацца, аналізуючы ўвесь ягоны жыцьцёвы шлях.
На апошнім мітынгу пратэсту ў Бялградзе Ваіслаў Каштуніца заклікаў да
праверкі пратаколаў галасаваньня на прэзыдэнцкіх выбарах. Копіі пратаколаў,
якія знаходзяцца ў руках апазыцыі, былі перададзеныя групе расейскіх назіральнікаў,
якія прыехалі ў Бялград. Магчымасьць накіраваньня экспэртаў дзеля вырашэньня
пытаньня пра вынік выбараў разглядае цяпер АБСЭ.
Мікола Іваноў, Прага
Самае папулярнае
1