Кансэрватыўна-Хрысьціянская партыя БНФ зь 1 па 3 верасьня праводзіла
маштабную акцыю па ўсёй Беларусі — адкрыты збор подпісаў у абарону незалежнасьці
Беларусі й супраць саюзу з Расеяй. Пад час акцыі міліцыянты затрымалі некалькіх
сяброў партыі.
Былі затрыманая намесьнік старшыні Кансэрватыўна-Хрысьціянскае партыі
БНФ Сяргей Папкоў і сябра партыі Ўладзімер Юхо. Спадара Юхо затрымалі нават
двойчы — 1 й 2 верасьня. Пра ягонае першае затрыманьне нашаму радыё распавёў
прэсавы сакратар КХП БНФ Валеры Буйвал.
(Буйвал: ) “1 верасьня прыкладна а 17 гадзіне да яго падыйшоў чалавек
у цывільным і сказаў, што ён зьяўляецца начальнікам Першамайскага РАУС
і ўсё запрашаў яго прысесьці ў сваю машыну. Але спадар Юхо адмовіўся. Тады
той па слухаўцы выклікаў міліцыянтаў і загадаў ім везьці яго ў Першамайскі
РАУС. Таксама забралі ў РАУС жанчыну, якая якраз падпісвала зварот у абарону
незалежнасьці Беларусі. Трымалі іх там тры гадзіны, склалі пратакол і інкрымінавалі
яму арганізацыю пікету паводле артыкулу 167 прым”.
Гэта быў Валеры Буйвал.
Суд над Уладзімерам Юхо прызначаны на аўторак. Але, як нам стала вядома,
позву ў суд спадар Юхо пакуль не атрымаў.
Другое затрыманьне сябраў Кансэрватыўна-Хрысьціянскае партыі БНФ пад
час збору подпісаў адбылося ў мінулую суботу. На праспэкце Скарыны ля будынку
філярмоніі былі затрыманыя намесьнік старшыні партыі Сяргей Папкоў і зноў
жа Ўладзімер Юхо. Каля гадзіны іх трымалі ў Савецкім РАУСе, а пасьля яны
зноў вярнуліся на пляц і працягвалі збор подпісаў.
Паводле папярэдніх зьвестак, зь 1 па 3 верасьня сябрамі партыі было
сабрана ва ўсёй Беларусі больш за 3 тысячы подпісаў. Сярод іх ёсьць і подпісы
грамадзянаў Расеі.
Як нам паведамілі ў прэсавай службе КХП БНФ, увогуле партыя сабрала
ўжо больш за 30 тысячаў подпісаў. Яны былі перададзеныя ў ААН, АБСЭ і амбасады
краінаў-гарантаў незалежнасьці Беларусі. Важнасьць гэтай акцыі, падкрэсьлівае
Валеры Буйвал, яшчэ і ў тым, што яна праводзілася напярэдадні “Саміту Тысячагодзьдзя”
Арганізацыі Аб’яднаных Нацыяў, які мае адбыцца ў Нью-Ёрку з 6 па 8 верасьня.
Ганна Соусь, Менск
Самае папулярнае
1