Жонка зьніклага год таму пры загадкавых абставінах
намесьніка старшыні Вярхоўнага Савету Віктара Ганчара Зінаіда зьвярнулася
да патрыяршага экзарха Беларусі Філарэта. Яна просіць ягонага садзеяньня
ў справе пошукаў мужа.
Сёньня жонка Віктара Ганчара Зінаіда даслала ліст на імя мітрапаліта
Менскага й Слуцкага Філарэта. Яна так пракамэнтавала сваё рашэньне радыё
Свабода:
(Зінаіда Ганчар: ) “Прычынаю майго звароту стала тое, што Філарэт, калі
быў дэпутатам Вярхоўнага Савету 12-га скліканьня, добра ведаў майго мужа.
Апроч таго, зьвярнуцца мяне прымусілі той бруд і дэзінфармацыя, якія сыходзяць
ад уладных структураў і выліваюцца на экраны тэлевізараў і старонкі газэтаў.
Гэта зман ня толькі ўсясьветнае супольнасьці, але й простых людзей. Я мяркую,
што царква павінна ўзняць голас дзеля абароны праўды й справядлівасьці”.
У сваім лісьце да патрыяршага экзарха Беларусі Філарэта Зінаіда Ганчар
піша:
“…прынятая 16 жніўня на Архірэйскім саборы сацыяльная дактрына Рускай
Праваслаўнай царквы абвяшчае: калі ўлада прымушае людзей да грахоўных дзеяньняў,
царква павінна адмовіць дзяржаве ў падпарадкаваньні. Лукашэнка і яго кляўрэты
ўжо даўно парушылі ўсе нормы чалавечае маралі. Гэтая ўлада сваімі дзеяньнямі
разбэшчвае душы людзей, насаджае распусту. Яна ставіць пад пагрозу само
існаваньне нашае краіны. І сёньня настаў час Праваслаўнай царкве сказаць
сваё важкае слова і гэтым дапамагчы нашаму народу адкрыць шлях да сьвятла
й праўды…”
Гаворыць Зінаіда Ганчар:
“Мінула столькі часу, а пра майго мужа няма ніякіх зьвестак. Самае страшнае,
што ўлады прымушаюць верыць, нібы ніхто й не распраўляецца з апанэнтамі
рэжыму. З экранаў Беларускае тэлевізіі Посахаў заклікаў ня верыць, што
людзей выкрадалі. Я разумею, што царква ня можа праводзіць расьсьледваньне,
але яна ў стане заклікаць урад не хітраваць, ня хлусіць. Я спадзяюся, што
яна выканае свой абавязак”, — паведаміла Зінаіда Ганчар радыё Свабода.
Любоў Лунёва, Менск
Самае папулярнае
1