Своеасаблівыя харчовыя атрады зь ліку інспэктараў дзяржаўнага
кантролю й спэцыялістаў абласных сельскагаспадарчых ворганаў накіроўваюцца
зараз у калгасы й саўгасы Гомельскае вобласьці. Мэта адна — прымусіць вёску
выканаць заказ на продаж збожжа дзяржаве.
Дзьве групы інспэктараў камітэту дзяржаўнага кантролю і аблсяльгасхарчу
правяралі сёньня засекі гаспадарак у Добрушскім і Кармянскім раёнах. На
чарзе такія ж праверкі калгасаў і саўгасаў Жлобінскага, Калінкавіцкага
ды шэрагу іншых сельскіх раёнаў. «Харчовыя атрады» трасуць вёскі з прычыны
таго, што вобласьць агулам не дадала да дзяржаўнага заказу 18 тысячаў тонаў
збожжа. І здарылася гэта, нягледзячы на афіцыйныя заявы пра тое, што сёлета
ў рэгіёне сабрана яго на 163 тысячы тонаў болей, чым летась.
Вось што, у прыватнасьці, кажа начальнік Добрушскага раённага сяльгасхарчу
Пятро Цішкоў:
«Збожжа ў нас ёсьць, але трэба, каб родная дзяржава грошы плаціла»,
— заявіў начальнік раённага сяльгасхарчу.
Паводле словаў спадара Цішкова, Узоўскі й Навабеліцкі хлебакамбінаты
ўжо больш за месяц ня могуць выплаціць гаспадаркам 102 мільёны рублёў за
раней здадзенае дзяржаве збожжа. Цяпер, калі хто й хоча дадаткова адвесьці
яго на хлебакамбінат, дык ня мае грошай на набыцьцё паліва.
Яшчэ адна прычына ў тым, што далёка ня ўсе раёны маюць жыта ды пшаніцу
ў наяўнасьці. 600 тысячаў тонаў валавога збору збожжа ў рэгіёне, пра які
распавядаюць улады, гэта ўсяго толькі бункерная вага. Пасьля мінімальнай
ачысткі яго становіцца на 10 адсоткаў меней. А каб атрымаць спраўнае харчовае
збожжа ці насеньне, дык трэба адмінусаваць яшчэ 25-30 адсоткаў.
Да таго ж шмат вырашчанага збожжа ў рэгіёне нельга скарыстоўваць на
харчовыя мэты з-за прычыны моцнае забруджанасьці радыёнуклідамі цэзію і
стронцыю.
Яшчэ 30 тысячаў тонаў збожжа новага ўраджаю было аддадзена вяскоўцам
у лік пагашэньня запазычанасьцяў у заробках, як таго патрабаваў сам кіраўнік
дзяржавы. Атрымліваецца, што лішкаў збожжа ў большасьці раёнаў сапраўды
няма. А калі мець на ўвазе даўгую зімоўку й патрэбу калгасаў у фуражы,
дык стане зразумела, чаму вяскоўцы не жадаюць начыста выграбаць свае й
без таго небагатыя засекі.
Казімер Яноўскі, Гомель
Самае папулярнае
1