Міжнародная Гэльсынская фэдэрацыя прыняла сёньня заяву адносна выбараў
у Беларусі, у якой зазначаецца, што выбарчы працэс цалкам кантралюецца
і маніпулюецца ўладамі, што грамадзянаў прымушаць галасаваць датэрмінова,
і што гэтыя выбары ніяк ня могуць быць прызнаныя свабоднымі й справядлівымі.
МГФ адмаўляецца назіраць за гэтымі выбарамі ў дзень галасаваньня.
Выканаўчы дырэктар Міжнароднай Гэльсынскай фэдэрацыі за правы чалавека
Эран Роўдз (Aaron Rhodes) зазначыў сёньня ў Менску, што ягоная арганізацыя,
грунтуючыся на шматлікіх фактах, ня можа прызнаць выбары ў Беларусі сумленнымі:
(Роўдз: ) “Гэтыя так званыя “выбары” больш падобныя на прызначэньне
дзяржаваю ў парлямэнт, які зьяўляецца “пацёмкінскай вёскаю”. Гэтыя “выбары”
нагадваюць нам рэфэрэндум 96-га году, калі вынікі былі вядомыя яшчэ да
адкрыцьця выбарчых участкаў. Ёсьць шмат паведамленьняў, што ўлады ціснуць
на людзей з мэтаю прымусіць іх галасаваць датэрмінова.
Але найбольшы шок быў у нас, калі мы даведаліся, што некаторыя дырэктары
школаў здымалі дзяцей з заняткаў і забавязвалі іх разносіць улёткі, прымушаючы
тым самым да палітычнае дзейнасьці”, — зазначыў выканаўчы дырэктар МГФ
Эран Роўдз.
Старшыня Цэнтравыбаркаму Лідзія Ярмошына так адрэагавала на названыя
ім абвінавачваньні:
(Ярмошына: ) “Тое, што ўлады заклікаюць галасаваць і вядуць пэўную работу
ў калектывах, заклікаючы прыйсьці і прагаласаваць, гэты факт ёсьць. Але
гэта не парушэньне закону. Фактаў прымусу няма”.
Паведаміла Лідзія Ярмошына. Паводле ейных словаў, дзеці выкарыстоўваліся
ў выбарчай кампаніі для разносу запрашэньняў на выбары, бо на пасылку іх
поштаю ў выбаркамаў няма грошай…
Эран Роўдз таксама выказаў свой непакой за рэакцыю ўладаў на акцыю апазыцыі
14 кастрычніка ў Менску і заклікаў даць грамадзянам магчымасьць адкрыта
выказаць сваю думку пра неабходнасьць байкатаваньня несправядлівых выбараў.
Прадстаўнікі Міжнароднае Гэльсынскае фэдэрацыі, якія цяпер знаходзяцца
ў Менску, як зазначыў Эран Роўдз, адмовіліся ад назіраньня за выбарамі
ў дзень галасаваньня.
Аднак за выбарамі будзе назіраць больш як пяць тысячаў незалежных назіральнікаў.
Гаворыць кіраўнік Цэнтральнае Каардынацыйнае рады ў справе назіраньня за
выбарамі:
(Грыб: ) “Мы падрыхтавалі на сёньня 5600 наглядальнікаў і накіравалі
іх на ўчасткі. Ва ўчастковыя камісіі, акруговыя. Праўда, ня ўсюль іх прынялі.
Паводле маіх зьвестак, 26-ці адмовілі ў нагляданьні паводле надуманых падставаў”.
Гэта быў Мечыслаў Грыб. Ён паведаміў, што папярэднія вынікі назіраньня
будуць абвешчаныя ў панядзелак.
Валер Каліноўскі, Менск
Самае папулярнае
1