“Віцебск — адзіны горад, дзе сёньня праводзіліся ня толькі мітынг, але
й шесьце. І гэтае ёсьць заслугай людзей, якія тут сабраліся”, — гэткімі
словамі пачаў свой выступ з прыступкаў філярмоніі на цэнтральным пляцы
Леніна намесьнік старшыні БСДП (НГ) Аляксей Кароль.
Мітынг завершыў двухгадзінную акцыю за свабодныя дэмакратычныя выбары
“Марш Свабоды-3”. А пачыналася ўсё з таго, што людзі, якія прыходзілі да
Ратушнай плошчы, бачылі тузін міліцэйскіх машын, чалавек дваццаць ў “блакітных”
плямістых строях. Па-за будынкам філярмоніі хаваўся КАМАЗ з чырвоным нумарам,
набіты вайскоўцамі ў плястыкавых шлемах і з аўтаматамі.
Зьбянтэжаныя мінакі спяшаліся хутчэй праскочыць гэтае небясьпечнае месца.
Але ўдзельнікі шэсьця спакойна разгортвалі сьцягі, уздымалі харугвы,
бралі ў рукі плякаты з заклікамі да байкоту выбараў, з параўнаньнем Лукашэнкі
зь Мілошавічам. Асаблівую ўвагу прыцягвалі плякаты-карыкатуры, якія падрыхтавалі
мясцовыя мастакі. Як заўжды ўсё актыўна здымалася на камэру людзьмі ў цывільным.
У каляровым натоўпе побач зь мініяцюрнай Людмілай Гразновай вылучалася
чырвоная майка дэпутата вярхоўнага Савету Валерыя Шчукіна, які ўжо па традыцыі
прыяжджае на акцыі ў Віцебск.
Сярод удзельнікаў пераважала моладзь. Трапяталі сьцяжкі маладых сацыял-дэмакратаў,
соўгаліся падлеткі з вайскова-спартовага клюбу “Мядзьведзь”, гуртаваліся
рокеры і мясцовыя анархісты. Арганізавана станавіліся ў шэрагі юнакі і
дзяўчаты — прыхільнікі АГП. Усіх зьдзівіла прысутнасьць фанатаў магілеўскага
“Дняпра”.
Калі калёна рушыла па вуліцы Суворава, ініцыятыву ўзяў на сябе Павал
Севярынец, лёзунгі якога падхоплівалі ня толькі паплечнікі з маладога фронту,
але й уся моладзь.
Гэта была ня самая вялікая акцыя ў Віцебску за апошні год. Аднак тыя
чатыры сотні чалавек, якія ўважліва слухалі выступоўцаў на мітынгу, адчувалі
сябе адказнымі за тое, што творыцца ў краіне. І нездарма амаль у кожнай
прамове як прыклад гучала перамога дэмакратыі ў Югаславіі. І ў аднагалосна
прынятай рэзалюцыі было сказана: “Фарс ня мае нічога агульнага з сапраўднымі
выбарамі. Натхнёныя падзеямі ў Югаславіі мы заклікаем іх байкатаваць!”
Алег Жукоўскі, Віцебск
Самае папулярнае
1