Лінкі ўнівэрсальнага доступу

Сёньня


(эфір 16 лістапада)
У Менску знаходзіцца місія Ўсясьветнага банку. Мэта візыту — абмеркаваньне пэрспэктываў супрацоўніцтва зь Беларусьсю.

Місія Ўсясьветнага банку правяла перамовы з шэрагам кіраўнікоў Беларусі. Як паведаміў сёньня кіраўнік місіі — рэгіянальны дырэктар банку Люка Барбонэ, на сустрэчах зь Мясьніковічам, Ярмошыным, Пракаповічам ды іншымі прадстаўнікамі ўладаў абмяркоўвалася сацыяльна-эканамічнае становішча краіны пасьля нядаўняе ўніфікацыі абменных курсаў.

Як вынікае з тлумачэньня спадара Барбонэ, гэтае абмеркаваньне сталася пачаткам кансультацыяў бакоў адносна новае стратэгіі міжнароднай фінансавай арганізацыі ў пытаньні супрацоўніцтва зь Беларусьсю. Перамовы з атачэньнем Аляксандра Лукашэнкі засьведчылі, што ў Банку і ўладаў Беларусі на сёньняшні дзень застаюцца разыходжаньні адносна ўмоваў партнэрства.

Гаворыць Люка Барбонэ:

“Усё яшчэ захоўваюцца рознагалосьсі ў пытаньнях асноўных кірункаў эканамічнае палітыкі, якую праводзіць урад. Я мяркую, што ўрад і народ Беларусі ведаюць, што не ва ўсіх пытаньнях нашыя погляды супадаюць. Аднак ёсьць такія сфэры, дзе нашае супрацоўніцтва прынясе карысьць. І цягам наступных 6 месяцаў мы будзем працаваць над распрацоўкаю стратэгіі дапамогі Беларусі на падставе вось гэтых прынцыпаў”, — заявіў Люка Барбонэ.

Яшчэ адна прадстаўніца Ўсясьветнга банку Лілія Бурунчук, якая зьяўляецца каардынатарам праграмаў у Беларусі, патлумачыла нашаму радыё:

“Што тычыццца новае стратэгіі, дык мы б хацелі распрацоўваюць яе з выкарыстаньнем новых працэдураў. Рэч у тым, што мы будзем абмяркоўваць стратэгію ня толькі з урадам, а й з прадстаўнікамі ўсяго грамадзтва. Урад пагадзіўся на такую форму партнэрства. Інакш кажучы, стратэгію мы будзем абмяркоўваць з экспэртамі, грамадзкімі арганізацыямі, мас-мэдыямі. Мы спадзяемся, што пад час цяперашняга візыту нам удасца правесьці такія адкрытыя дыскусіі”, — зазначыла спадарыня Бурунчук.

Люка Барбонэ сустракаўся таксама ў Менску й Маладэчне з прадстаўнікамі няўрадавых арганізацыяў Беларусі. Апроч таго, разам з прэм’ерам Уладзімерам Ярмошыным кіраўнік місіі Ўсясьветнага банку прааналізаваў рэалізацыю пілотнага праекту, які тычыцца энэргазьберажэньня ва ўстановах аховы здароўя і адукацыі.

Паводле меркаваньняў прадстаўнікоў Усясьветнага банку, згаданы праект вельмі карысны для Беларусі. Аднак пэрспэктыва рэалізацыі пакуль цьмяная. Паводле дамоўленасьцяў, рэканструкцыю энэргасыстэмаў у школах і лякарнях Усясьветны банк і ўрад Беларусі мусяць фінансаваць на парытэтных умовах. Аднак пакуль што беларускі бок не зрабіў свайго ўнёску.

Міхал Стэльмак, Менск

XS
SM
MD
LG