Лінкі ўнівэрсальнага доступу

Сёньня


У Менскай вобласьці дэмакратычна настроеная моладзь буйных гарадоў сёньня таксама далучылася да агульнарэспубліканскай акцыі “Пераменаў”. З Барысава паведамляе наш карэспандэнт.

Прыкладна ў 11.10 менскага часу на цэнтральны пляц Барысава выйшла ды пачала разгортваць пікет група актывістаў філіі “Маладой Грамады”. Як і сябры партыі БСДП (НГ), яны з 20 ліпеня мінулага году, з прычыны таго, што Лукашэнка стаўся нелегітымным кіраўніком дзяржавы, перасталі пытацца дазволу ва ўладаў, каб праводзіць тую ці іншую палітычную акцыю.

І сёньняшні пікет у іх быў несанкцыянаваны. Плякаты зь лёзунгамі “Моладзь патрабуе пераменаў!”, “Мы, Беларусы, бяз братняе Русі!” трымалі сямнаццацігадовая Алена Ясюк, яе 14-гадовая сястра Марына і таксама 14-гадовы Міхась Кузьняцоў.

Літаральна празь 2-3 хвіліны да пікетоўцаў падруліў варанок, адкуль выйшаў нарад міліцыянтаў на чале з капітанам Белым. Яны пазабіралі ў падлеткаў плякаты і запрапанавалі тым сесьці ў машыну. У аднаго з ахоўнікаў парадку на плячы боўтаўся аўтамат, другі меў пры сабе пісталет.

Супраць гэткай узброенасьці запярэчыў старшыня філіі БСДП (НГ) Алесь Абрамовіч, і з гэтае нагоды стаў дапякаць міліцыянтаў, тады апошнія закінулі ў варанок і яго, хаця спадар Абрамовіч знаходзіўся тут у якасьці наглядальніка ад сваёй партарганізацыі.

У пастарунку на ўсіх былі складзеныя пратаколы аб правапарушэньні паводле артыкулу 167 прым. Дзяжурны капітан пасьля гэткае працэдуры перадаў дзяцей у рукі бацькоў і паведаміў, што пратаколы будуць перададзеныя на гарадзкую камісію ў справах непаўнагадовых.

Тут жа разабраліся са статусам Алеся Абрамовіча і адпусьцілі яго на волю. Зараз ён знаходзіцца побач са мной:

(Абрамовіч: ) “Бадай упершыню за ўсю гісторыю барысаўскіх пратэстовых акцыяў, да пікетоўцаў падыйшлі міліцыянты з аўтаматамі. Мы лічым, што гэта было мэтанакіраванае запалохваньне падлеткаў. Зброяй гэтых падлеткаў былі толькі плякаты, гэта была выключна мірная акцыя. Мусіць, у рэжыма зусім кепскія справы, калі дзяцей канваююць аўтаматчыкі”.

Жодзінская моладзь таксама ня стала прасіць дазволу ва ўладаў на правядзеньне акцыі “Пераменаў”, якую, дарэчы, яна адзначыла гэтай ноччу.

Юнакі і дзяўчаты ў цэнтры гораду ўсталявалі на самых вышынных будынках некалькі бел-чырвона-белых сьцягоў. А на шыльдачкі з назвамі галоўных вуліцаў “40-год кастрычніка”, “50-год БССР” ды іншых прымацавалі назвы імя Янкі Купалы, імя Якуба Коласа ды імя Францішка Скарыны.

Алесь Мікалайчанка, Барысаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG