Кансультацыйна-назіральная група АБСЭ ў Беларусі мае неабмежаваны па
часе мандат на сваю дзейнасьць і будзе працягваць працу. Пра гэта заявіў
сёньня кіраўнік КНГ Ганс-Георг Вік пад час паседжаньня Кансультацыйнае
рады апазыцыйных палітычных партыяў. Ягоная заява было зроблена таму, што
некаторыя мас-мэдыі паведамілі, быццам КНГ зьяжджае зь Менску ў траўні
2001 году.
Амбасадар Вік ня толькі абверг чуткі пра закрыцьцё групы, але й азнаёміў
прысутных з новымі плянамі КНГ. Як і раней, галоўным застаецца выкананьне
беларускімі ўладамі чатырох вядомых умоваў, без чаго міжнародная супольнасьць
ня можа прызнаць любыя выбары ў Беларусі дэмакратычнымі й празрыстымі.
Акрамя таго, улічваючы пэўны досьвед выбараў у гэтак званую “Палату
прадстаўнікоў”, КНГ будзе больш займацца мадэрнізацыяй і паляпшэньнем сыстэмы
ўнутранага назіраньня за прэзыдэнцкімі выбарамі. Вырашана таксама пашырыць
маніторынг за дзейнасьцю мас-мэдыяў і парушэньнямі правоў чалавека. Дзеля
паляпшэньня выбарчага заканадаўства да працы будуць прыцягнутыя экспэрты
Бюро дэмакратычных інстытутаў і правоў чалавека, а таксама венэцыянскае
камісіі Рады Эўропы.
Паводле Ганса-Георга Віка, менавіта такія пляны ён прапаноўваў на апошнім
паседжаньні Палітычнага камітэту АБСЭ ў Вене, і атрымаў там поўную падтрымку.
Прадстаўнікі апазыцыі акцэнтавалі ўвагу на ўроках нядаўніх выбараў.
Як і раней, палітыкі ад апазыцыі шмат казалі пра неабходнасьць аб’яднаньня
намаганьняў. Аднак сёньня, бадай, упершыню прагучаў заклік да яднаньня
ня толькі палітычнай апазыцыі, але й апазыцыі сацыяльнай — усіх тых, хто
выступае за перамены ў Беларусі. Сярод патэнцыйных прыхільнікаў — і прафсаюзы,
і няўрадавыя арганізацыі, і проста грамадзяне. Мікола Статкевіч, які старшыняваў
на паседжаньні, нагадаў пра ўчорашнюю ініцыятыву дэмакратаў Воршы, якія
прапанавалі стварыць рух пад назовам “Пераменаў!” Вырашана падрыхтаваць
гэтае пытаньне больш грунтоўна й разгледзець яго на наступных сустрэчах.
Дарэчы, пасьля працяглага перапынку сёньня на нарадзе зьявіўся прадстаўнік
Лібэральна-Дэмакратычнае партыі. Яна ўзнавіла сваю дзейнасьць у рамках
Кансультацыйнае рады.
Уладзімер Глод, Менск
Самае папулярнае
1