Сёньня ў Вене на пленарным паседжаньні АБСЭ адбылося чарговае абмеркаваньне
сытуацыі ў Беларусі.
Як паведаміў нам па тэлефоне зь Вены прэсавы сакратар АБСЭ Манс Нібэрг,
абмеркаваньне прайшло за зачыненымі дзьвярыма і ніякай пастановы ў гэтай
справе прынята не было. Нібэрг падкрэсьліў, што не ўпаўнаважаны інфармаваць
сродкі масавай інфармацыі аб ходзе абмеркаваньня.
Сёньня ж афіцыйны прадстаўнік Арганізацыі бясьпекі і супрацоўніцтва
ў Эўропе заявіў, што вялікая колькасьць жыхароў Беларусі хоча зьменаў у
палітычнай сытуацыі ў краіне, і АБСЭ мусіць працаваць у гэтым накірунку.
Кіраўнік Кансультатыўнай групы АБСЭ ў Беларусі Ганс Гэорг Вік заявіў
Сталаму камітэту арганізацыі, што жаданьне зьменаў сярод беларускага жыхарства
мусіць падахвочваць АБСЭ дамагацца росту дэмакратыі да прэзыдэнцкіх выбараў,
прызначаных на наступны год. У той самы час Ганс Гэорг Вік заявіў карэспандэнту
нашага Радыё, што напярэдадні выбараў АБСЭ зьбіраецца працаваць у накірунку
перагляду выбарчага заканадаўства ў Беларусі.
Мікола Іваноў, Прага
Самае папулярнае
1