Прадстаўнікі ізраільскай амбасады маюць намер вярнуцца
ў Беларусь на працягу гэтага тыдня.
У Ізраільскім культурна-асьветніцкім цэнтры мне паведамілі, што, хутчэй
за ўсё частка супрацоўнікаў амбасады вернецца ў Беларусь у чацьвер, а ўсе
астатнія – у нядзелю. Гэта зьвязана з тым, што ізраільская авіякампанія
“Эль-Аль” выконвае рэйсы ў Менск толькі двойчы на тыдзень. У мінулую нядзелю
прадстаўнікі амбасады вярнуцца ў Беларусь не пасьпелі.
На прыканцы мінулага тыдня зьявіліся чуткі пра тое, што Беларусь таксама
пакінулі прадстаўнікі агэнцыі “Сахнут” ды Ізраільскага культурнага цэнтру.
Але ў Ізраільскім культурным цэнтры мне распавялі, што кіраўніцтва цэнтру
знаходзіцца ў заплянаваным адпачынку, які працягнецца да 1 чэрвеня. У Цэнтры
таксама паведамілі, што кіраўніцтва набыло авіяквіткі за месяц да таго,
як зьехала кіраўніцтва амбасады.
Што тычыцца агэнцыі “Сахнут”, дык яе кіраўніцтва зараз знаходзіцца ў
Менску. Кіраўнік прадстаўніцтва “Сахнуту” Барух Каміль нават браў удзел
у фэстывалі нацыянальных культур на прыканцы мінулага тыдня. На мінулым
тыдні цытавалася выказваньне спадара Каміля пра тое, што ў выпадку неабходнасьці
агэнцыя можа наладзіць эвакуацыю людзей зь Беларусі.
У Ізраільскім культурным цэнтры мне патлумачылі, што эвакуацыя людзей
у выпадку ўзьнікненьня надзвычайных абставінаў – адная з функцыяў гэтае
агэнцыі. “Сахнут”, напрыклад, займаўся эвакуацыяй пад час ваенных дзеяньняў
у Малдове, а таксама зь небясьпечных афрыканскіх краінаў. Таму прадстаўнікі
агэнцыі павінныя быць гатовыя на выпадак эвакуацыі.
У той жа час іншыя амбасады ня маюць намеру вывозіць сваіх супрацоўнікаў.
У хуткім часе амэрыканская амбасада чакае візыту тэхнічнае місіі, якая
спраўдзіць узровень радыяцыйнае бясьпекі ў нашай краіне. Аднак амбасада
падрыхтавала даведку для грамадзянаў ЗША, у якой сказана, што сур’ёзнае
небясьпекі, зьвязанае з радыяцыяй у Беларусі, цяпер няма.
Ганна Навумовіч, Менск
Самае папулярнае
1