Скандал на міжнародным артыстычным фэсьце “Менская Вясна”: гарадзкія
ўлады забаранілі правядзеньне тэатральнага пэрфомансу й выніковае прэсавае
канфэрэнцыі.
Сёньня праграма другога дня міжнароднага артыстычнага фэсту “Менская
Вясна”, зладжанага грамадзка-культурнымі незалежнымі творчымі аб’яднаньнямі
Польшчы, Нямеччыны й Беларусі, мела распачацца адмысловым тэатральным пэрфомансам
у сталічным тэатры “Дзе-Я”.
Аднак напярэдадні стала вядома, што гарадзкія ўлады забаранілі творцам
ладзіць гэтую мастацкую акцыю. Больш таго, яны наклалі табу й на выніковую
прэсавую канфэрэнцыю, правядзеньне якое плянавалася арганізатарамі фэсту
заўтра таксама ў муніцыпальным тэатры “Дзея-Я”.
Каб высьветліць прычыны ці матывы забароны, я патэлефанавала ва ўпраўленьне
культуры Менгарвыканкаму. І вось што пачула ў адказ на мае пытаньні ад
намесьніка начальніка аддзелу Анатоля Сабітава…
(Сабітаў: ) “Забаронены… Хто вам гэта сказаў?”
(Карэспандэнтка: ) “Гэта ўчора прагучала на прэсавай канфэрэнцыі”.
(Сабітаў: ) “Ну дык дурняў хапае ў нас у горадзе. Дык што, кожнага слухаць”.
(Карэспандэнтка: ) “Скажыце, а выніковая прэсавая канфэрэнцыя…?”
(Сабітаў: ) “Ня ведаю, я не займаўся гэтым мерапрыемствам. Дырэктар
тэатру займаецца, хай разьбіраецца ў сябе”.
(Карэспандэнтка: ) “А пэрформанс, які сёньня там меўся быць?”
(Сабітаў: ) “У нас больш важныя мерапрыемствы, чым гэтая лякальная вясна.
Унас наперадзе 24-га і акцыі 2000-годзьдзя хрысьціянства. Вы ведаеце аб
гэтым”.
(Карэспандэнтка: ) “Адно аднаму не перашкаджае”.
(Сабітаў: ) “Вось мы і не “перешкаджаем”…”
(Карэспандэнтка: ) “Дык перфоманс будзе ці не?”
(Сабітаў: ) “Не зна-ю!!”
(Карэспандэнтка: ) “А хто можа ведаць?”
(Сабітаў: ) “Арганізатары”.
Гэта быў намесьнік начальніка ўпраўленьня культуры Менгарвыканкаму Анатоль
Сабітаў.
Арганізатары фэсту сёньня яшчэ раз пацьвердзілі факт забароны й пэрфомансу,
і заўтрашняе прэсавае канфэрэнцыі. На спробы высьветліць прычыны, арганізатарам
было сказана, што пэрфоманс, маўляў, ладзіца на адкрытай пляцоўцы ля тэатру,
а таму на ягонае правядзеньне патрэбны дазвол гарадзкіх уладаў як на вулічную
акцыю.
Гэткім чынам, мастацкая імпрэза прыраўняная да мітынгу, шэсьця або пікету.
Тлумачэньне ж адносна забароны прэсавае канфэрэнцыі ў памяшканьні тэатру
“Дзе-Я” – нібыта нямэтавае выкарыстаньне тэатральнае залі. Усе гэтыя тлумачэньні
перададзеныя праз дырэктара тэатру “Дзе-Я”.
Тым ня менш і пэрфоманс, і прэсавую канфэрэнцыю арганізатары фэсту маюць
намер правесьці, не афішуючы, аднак, дзе і як.
Валянціна Аксак, Менск
Самае папулярнае
1