Лінкі ўнівэрсальнага доступу

Сёньня


Генэральны пракурор Беларусі Алег Бажэлка пад час расьледваньня справы Міхала Чыгіра аддаваў сьледчым ворганам указаньні, якія груба парушаюць працэсуальнае заканадаўства Беларусі. Гэтак сьцьвярджаюць адвакаты экс-прэм’ера Беларусі, спасылаючыся на дакумэнт, які быў агалошаны на працэсе над Міхалам Чыгіром.

Гаворка йдзе пра ўказаньне ад 28 траўня мінулага году, дадзенае генэральным пракурорам Алегам Бажэлкам кіраўніку сьледчага камітэту Леаніду Глухоўскаму.

Нагадаю, у той час Міхал Чыгір ужо быў у ізалятары на вуліцы Валадарскага, пракуратура заяўляла, што ён падазраецца ў крадзяжы дзяржаўнае маёмасьці ў буйных памерах, але доказаў гэтага абвінавачваньня ў сьледчых не было аніякіх. Інакш не было б гэтага дакумэнту, у якім на трох старонках падрабязна расьпісана, куды трэба сьледчым паехаць і што зрабіць, каб адшукаць (цытую ўказаньне) “доказы злачыннае дзейнасьці“ Чыгіра.

Алег Бажэлка, такім чынам, быў перакананы, што былы прэм’ер – злодзей. У першым пункце свайго цыркуляру ён даручае сьледчым зьезьдзіць у Маскву й спраўдзіць “незаконную прадпрымальніцкую дзейнасьць Чыгіра ў Маскве безь ліцэнзіі і ўхіленьне ад уплаты падаткаў і разгледзець пытаньне аб узбуджэньні супраць Чыгіра справы за ўказанае злачынства”.

Як бачым, сьледчымі яшчэ нічога ня знойдзена, яны яшчэ не выправіліся ў Маскву, а ім ўжо абвешчана, што Чыгір злачынца.

Гэткая ж выснова зробленая і ў другім пункце дакумэнту: “Пад час далейшага расьледваньня, – піша Бажэлка, – трэба забясьпечыць магчымыя захады ў кампэнсацыі стратаў, нанесеных дзяржаве злачыннымі дзеяньнямі Чыгіра пры незаконнай выдачы крэдытаў”.

Зьвяртаю ўвагу на тое, што магчымымі ў гэтым пункце названыя захады ў вяртаньні крэдытаў, а не злачынствы Чыгіра. Са злачынствамі Бажэлку ўсё зразумела. У астатніх шасьці пунктах ён прытрымліваецца той жа пазыцыі – што вінаватасьць Чыгіра трэба даказваць усімі магчымымі захадамі.

У прыватнасьці, пяты пункт указаньня ппрадугледжвае пошукі замежных рахункаў Чыгіра, а паводле шостага належыць праверыць маёмасьць сыноў экс-прэм’ера і ўсіх ягоных сваякоў. Замежных рахункаў Чыгіра не знайшлі, ды і як выканаць такое ўказаньне – хіба што праверыць усе банкі сьвету. А вось сваякоў экс-прэм’ера патрэсьлі як тую грушу. Узгадвае жонка Міхала Чыгіра Юлія:

(Юлія Чыгір: ) “Правяралі ня толькі сыноў. Як вы ведаеце, правяралі і маіх сясьцёр. Маю сястру выклікалі сюды. Яна ў 91-м годзе купіла “Жыгулі”, і ёй сказалі, што ў тыя гады свабодна машыну нельга было купіць. Як ты яе купіла? Гэта толькі Чыгір табе дапамог”.

Паведаміла Юлія Чыгір.

Адвакаты экс-прэм’ера Аляксандар Пыльчанка і Юлія Чыгір, грамадзкія абаронцы Гары Паганяйла й Барыс Гюнтар заявілі пасьля агалошваньня ліста Бажэлкі, што гэты дакумэнт парушае 20-ы артыкул Працэсуальнага кодэксу Беларусі і, акрамя таго, у ім бачныя прыкметы арганізацыі псыхалягічнага ціску на абвінавачванага шляхам перасьледу ягоных сваякоў, што зьяўляецца парушэньнем ужо Крымінальнага кодэксу.

“Мы будзем дамагацца, каб пракуратура краіны адрэагавала на гэты дакумэнт, хаця й разумеем, што вынік такога разгляду ў цяперашняй Беларусі прадказальны”, – заяўляюць адвакаты Міхала Чыгіра.

Алег Грузьдзіловіч, Менск

XS
SM
MD
LG