10 сакавіка шэраг беларускіх праваабаронцаў бралі ўдзел у відэаканфэрэнцыі
з удзелам намесьніка Дзяржаўнага сакратара Злучаных Штатаў Амэрыкі ў пытаньнях
правоў чалавека, дэмакратыі і працы Гаральда Коў. Размова была прысвечана
вынікам учорашніх слуханьняў адносна сытуацыі з правамі чалавека ў Беларусі,
што адбыліся ў Кангрэсе ЗША.
Намесьнік Дзяржаўнага сакартара ЗША Гаральд Коў, які выступаў з дакладам
адносна праблемы правоў чалавека ў Беларусі на слуханьнях у Кангрэсе, наведваў
Менск у лістападзе мінулага году, і як высьветлілася, з бальшынёю сваіх
беларускіх суразмоўцаў ён ужо знаёмы. У самым пачатку сэансу відэасувязі
паміж Менскам і Вашынгтонам Гаральд Коў зазначыў, што, на ягоную думку,
сытуацыя ў Беларусі пасьля ягонага візыту значна пагоршылася. Гаворыць
Гаральд Коў:
“У Вашынгтоне застаецца глыбокая занепакоенасьць з нагоды сытуацыі з
правамі чалавека ў Беларусі. Быў пэўны момант для аптымізму, калі вызвалілі
спадара Чыгіра, аднак пасьля гэтага зьявілася шмат нагодаў да расчараваньняў.
Мы застаемся занепакоенымі з-за працягу ўціску на незалежныя газеты, нас
непакоіць абыходжаньне з арыштаванымі, абмежаваньні на працу адвакатаў.
Але важнейшыя пытаньні, якія цяпер нас хвалююць, гэта нутрыпалітычны дыялёг
у Беларусі й “Марш Свабоды–2”, што адбудзецца на наступным тыдні”, – сказаў
Гаральд Коў.
Прадстаўнік Дзяржаўнага дэпартамэнту падкрэсьліў, што ЗША настойваюць
на сапраўдным дыялёгу ў адпаведнасьці з прынцыпамі АБСЭ, які б прывёў да
рэальных вынікаў, у тым ліку – да зьменаў у Выбарчым кодэксе ў адпаведнасьці
з рэкамэндацыямі АБСЭ.
Адносна “Маршу Свабоды–2” спадар Коў зазначыў, што Дзяржаўны дэпартамэнт
рыхтуе зварот да ўраду Беларусі з заклікам выканаць свае забавязаньні ў
забесьпячэньні свабоды сходаў і дэманстрацыяў.
Прадстаўнікі беларускіх праваабарончых арганізацыяў распавялі супрацоўнікам
Дзяржаўнага дэпартамэнту ЗША пра апошнія падзеі ў краіне, падкрэсьліўшы,
што ініцыяваны Лукашэнкам дыялёг аніяк не паўплываў на паляпшэньне сытуцыі
з правамі чалавека й крымінальным перасьледам палітычных дзеячоў.
Старшыня Беларускага Гэльсынскага камітэту Тацяна Процька закранула
пытаньне пра стаўленьне ЗША да падпісаньня “саюзнае” дамовы паміж Расеяй
і Беларусьсю, якую нельга прызнаць законнай, паколькі тэрмін паўнамоцтваў
Лукашэнкі скончаны, а Нацыянальны сход нелегітымны. Гаральд Коў адказаў,
што ва ўрадзе ЗША ведаюць і адпаведным чынам успрымаюць гэтыя абставіны.
Гаворыць Таццяна Процька: “Мы ўпэўніліся, што ЗША разглядаюць Беларусь
як сувэрэнную краіну й ня маюць намеру адыйсьці ад гэтага разуменьня, і
ўсе гэтыя “саюзныя” дамовы і іншыя памкненьні зьнішчыць незалежнасьць нашае
краіны – гэта пакуль што толькі мары пэўных палітыкаў, мары, якія ня маюць
магчымасьці зьдзейсьніцца, бо Злучаныя Штаты ўсё ж на сёньняшні дзень вельмі
ўплывовая ў сьвеце дзяржава”, – адзначыла Тацяна Процька пасьля размовы
з прадстаўнікамі Дзяржаўнага дэпартамэнту ЗША.
Увогуле, беларускія праваабаронцы адчулі зацікаўленасьць і падтрымку
з боку парлямэнту і ўраду Злучаных Штатаў. Гаворыць выканальнік абавязкаў
старшыні Праваабарончага цэнтру “Вясна” Валянцін Стэфановіч:
“Сам факт, што адбыліся слуханьні ў правах чалавека ў Кангрэсе – гэта
вельмі важна. Можа быць, нейкім чынам гэта паўплывае на наш урад і прымусіць
яго выконваць тыя міжнародныя забавязаньні, якія Беларусь узяла на сябе
ў галіне правоў чалавека. Я думаю, што ў прадстаўнікоў Кангрэсу і ўраду
Амэрыкі будзе складвацца адпаведная праўдзівая інфармацыя аб сытуацыі з
правамі чалавека, з дыялёгам, з выбарамі, якую яны атрымаюць зь першых
вуснаў”, – адзначыў Валянцін Стэфановіч, які назваў размову з прадстаўнікамі
Дзяржаўнага дэпартамэнту ЗША зьмястоўнай.
Дарэчы, на наступным тыдні зь візытам ў Менск прыбудзе адзін з вашынгтонскіх
удзельнікаў гэтае размовы Ральф Вільсан, у якога заплянаваная тут вялікая
праграма сустрэчаў.
Валер Каліноўскі, Менск
Самае папулярнае
1