У Фрунзэнскім РАЎС Менску быў складзены адміністрацыйны пратакол на
сябра БНФ пад кіраўніцтвам Зянона Пазьняка Ўладзімера Вераскоўскага за
збор подпісаў супраць аб’яднаньня Беларусі й Расеі.
Учора ўвечары сяброў БНФ пад кіраўніцтвам Зянона Пазьняка Валянціна
Дыро і Ўладзімера Вераскоўскага затрымалі супрацоўнікі міліцыі Фрунзэнскага
РАЎСу пад час збору подпісаў жыхароў аднаго шматпавярховага дому. Тыя грамадзяне,
якія ставілі подпіс супраць аб’яднаньня Беларусі й Расеі, атрымлівалі ўлёткі
з заклікам сойму партыі падтрымаць няспынную акцыю “Беларуская Салідарнасьць”
у абарону незалежнасьці, свабоды й сувэрэнітэту Беларусі. Міліцыянты адвезьлі
затрыманых у Фрунзэнскі РАЎС, пратрымалі іх там каля трох гадзінаў, а пасьля
гэтага ўручылі позвы ў міліцыю на раніцу наступнага дня.
Пэнсіянэр Уладзімер Вераскоўскі паведаміў “Радыё Свабода”:
“Учора ўвечары а палове на шостую мы пачалі збор подпісаў супраць аб’яднаньня
Беларусі з Расеяй. Сабралі трыццаць пяць подпісаў. Жыхары кожнае трэцяе
кватэры падпісваліся на нашым блянку. Праз гадзіну прыехала міліцыя, бо
нейкая жанчына патэлефаніла ў пастарунак, і нас забралі. Трымалі нас у
пастарунку тры гадзіны. Зь мяне ўзялі тлумачэньне, чаму я гэта рабіў. Я
казаў, што хачу, каб Беларусь была незалежнай – як Латвія, Летува, Украіна.
І толькі сёньня на мяне склалі пратакол, зь якім я ня згодны”, – паведаміў
нашаму радыё Ўладзімер Вераскоўскі.
Пратакол, зь якім ня згодны спадар Вераскоўскі, быў складзены паводле
артыкулу 172-га часткі 3 Адміністрацыйнага кодэксу (распаўсюджваньне друкаваных
выданьняў, зьмест якіх скіраваны на ўчыненьне шкоды дзяржаўнаму й грамадзкаму
парадку, правам і законным інтарэсам грамадзянаў). За гэта прадугледжанае
пакараньне ў выглядзе папярэджаньня або штрафу.
Пратакол на Валянціна Дыро ўвогуле вырашылі не складаць. Намесьнік начальніка
аддзелу прафіляктыкі й правапарадку Віктар Кулявец загадаў адміністрацыйныя
матэрыялы на Ўладзімера Вераскоўскага перадаць ня ў суд, а на адміністрацыйную
камісію ў выканаўчы камітэт.
Юрась Беленькі, намесьнік старшыні БНФ пад кіраўніцтвам Зянона Пазьняка,
прысутнічаў у Фрунзэнскім РАУСе пад час складаньня пратаколу. Ён пракамэнтаваў
гэтую сытуацыю “Радыё Свабода”:
(Беленькі: ) “Мы лічым, што збор подпісаў за незалежнасьць, супраць
уцягваньня Беларусі ў Расейскую імпэрыю, гэта самая надзённая, самая актуальная
праца на сёньняшні дзень. Гэтыя подпісы ідуць у амбасады ЗША, Вялікай Брытаніі,
у ААН і АБСЭ. Чаму названыя такія краіны, як ЗША і Вялікая Брытанія? Таму,
што гэтыя краіны калісьці выступілі гарантамі нашай незалежнасьці.
І вось я трымаю перад вачыма так званы “протокол изъятия”. Дык вось
што шаноўныя нашыя міліцыянеры напісалі. Яны забралі: першае, гэта ўлёткі
звароту да беларускга нроду, 16 штук напісана; другое, палажэньне аб дачыненьнях
Кансэрватыўна-хрысьціянскай партыі БНФ з палітычнымі арганізацыямі і структурамі…
Івось на падставе гэтага быў складзены сёньня пратакол. Зьдзіўляе тое,
што грамадзянаў затрымалі ўчора ўвечары, трымалі тры гадзіны ў РАЎС, але
паклікалі ў міліцыю толькі сёньня, і толькі сёньня пачалі складаць пратакол”.
– паведаміў Юрась Беленькі.
Супрацоўнікі міліцыі адмовіліся вярнуць улёткі й блянкі з подпісамі,
матывуючы гэта тым, што хочуць зрабіць зь іх копіі.
Любоў Лунёва, Менск
Самае папулярнае
1