На наступным тыдні ў Варшаве адбудзецца ўнікальная ў пэўным сэнсе міжнародная
канфэрэнцыя.
На тры дні, пачынаючы з 25 чэрвеня, ў Варшаве зьбяруцца дзяржаўныя і
палітычныя лідары з больш як сотні краінаў сьвету, якія трывала крочаць
па шляху дэмакратыі. Мэта канфэрэнцыі – абмеркаваньне і выпрацоўка мэтадаў
паскарэньня дэмакратычных працэсаў ва ўсім сьвеце, і, у тым ліку, абарона
дэмакратыі ў тых рэгіёнах, дзе існуе для яе пагроза.
У якасьці арганізатараў канфэрэнцыі выступаюць ўрады сямі краінаў –
у тым ліку Польшчы, Чэхіі і ЗША. Узначальваць амэрыканскую дэлегацыю будзе
Дзяржсакратар ЗША Мадлен Олбрайт. Як мы ўжо паведамлялі, учора два сэнатары
зьвярнуліся да Олбрайт з прапановай правесьці сустрэчу з намесьнікам старшыні
Вярхоўнага Савету Беларусі 13-га скліканьня Анатолем Лябедзькам і іншымі
лідарамі беларускай апазыцыі.
Памочнік Дзяржсакратара ЗША ў справах дэмакратыі, правоў чалавека і
прафсаюзаў Гэральд Кох наступным чынам вызначыў мэты канфэрэнцыі:
(Кох: ) “Мы чакаем ад гэтай канфэрэнцыі, што дэмакратычныя краіны, якія
будуць прадстаўленыя, прымуць Варшаўскую дэклярацыю. У ёй будуць вызначаныя
базавыя прынцыпы і мэтады, якія складуць ўнівэрсальную канцэпцыю дэмакратыі.
Па-другое, прадстаўнікі ўрадаў дамовяцца адносна больш шчыльнага супрацоўніцтва
ў справе рэалізацыі гэтых прынцыпаў”.
Памочнік Дзяржсакратара ЗША Гэральд Кох адзначыў таксама, што ў параўнаньні
з 1974 годам колькасьць дэмакратычных краінаў у сьвеце павялічылася з 30-ці
да 120-ці. Тым ня менш, ён зьвярнуў увагу на адну цікавую заканамернасьць.
(Кох: ) “Іронія палягае ў тым, што, хаця ў стратэгічнай пэрспэктыве
дэмакратыя ёсьць найбольш стабільнай формай дзяржаўнага ўладкаваньня, яна
адначасна – даволі крохкая, і таму вымагае падтрымкі, асабліва там, дзе
яна толькі ўсталёўваецца. Мы мяркуем, што гэта вельмі вялікае дасягненьне
– вольныя і справядлівыя выбары ў тых краінах, дзе іх раней не было. У
той жа час мы ўведалі, што нашмат цяжэй ўсталяваць дэмакратычныя каштоўнасьці,
інстытуцыі і разьвіць патэнцыял грамадзскай супольнасьці”.
Гэральд Кох выказаў спадзяваньне, што супрацоўніцтва ў сфэры пашырэньня
дэмакратыі будзе пасьпяховым. Пры гэтым памочнік Дзяржсакратара ЗША акцэнтаваў
увагу на варыяньце супрацоўніцтва паміж ўрадавымі ўстановамі і недзяржаўнымі
арганізацыямі.
На прэсавай канфэрэнцыі Гэральду Коху было зададзенае пытаньне, якія
адносіны будуць мець ЗША і іншыя краіны з дзяржавамі кшталту Аўстрыі, якая
падлегла эканамічным санкцыям з прычыны ўдзелу ва ўрадзе ўскрайне правых,
а таксама з Расеяй, якая на Захадзе крытыкуецца за чачэнскую кампанію.
Памочнік дзяржсакратара заявіў, што канфэрэнцыя якраз і будзе яшчэ адной
магчымасьцю паўплываць на гэтыя краіны.
Сяргей Навумчык, Прага
Самае папулярнае
1