Кожнае чалавечае нараджэньне запальвае ў небе зорку, кожная сьмерць
- зьнічку. Згарэў, як зьнічка - кажуць пра чалавека,
што пражыў нядоўгае поўнае падзеяў жыцьцё і памёр хутка й прыгожа.
Зьнічка - зорка ў часе падзеньня - адна з самых цікавых і прыгожых
касьмічных зьяваў. Паводле слоўніка Насовіча, зьнічка яшчэ
- беспрытульны агонь і, нават, асоба, што зьяўляецца ненадоўга.
Гэтае апошняе значэньне патрабуе дадатковых тлумачэньняў, бо па-першае:
ня кожная зьнічка-асоба зьнікае. Паўлюк Багрым - літаратурная
зьнічка XIX стагодзьдзя і адначасна нязгасная зорка паэзіі.
Цэлыя сузор'і зьнічак-талентаў расстраляныя і закатаваныя сталінцамі
і фашыстоўцамі.
Па-другое: ня кожную асобу якая зьяўляецца часова, можна назваць зьнічкай,
бо ў самім гэтым слове схаваная вылучна станоўчая характарыстыка.
Таму як зьнічку ня можна разглядаць, напрыклад, Аляксандра Лукашэнку.
Мігнецца стужка агнявая -
То зьнічка згасьне залатая, - пісаў Якуб Колас. Навукоўцы мяркуюць, што ў лінгвістычным сэнсе зьнічка - дачка Зьніча - вечнага паганскага агню. Агонь гэты мелі ўсе славяне, а зьнічку - толькі мы. Жнівень і верасень - самыя зьнічкавыя месяцы ў Беларусі. Нягледзячы на халодныя ночы, закаханыя ў гэты час саграюць адно аднаго ня толькі абдымкамі ды пацалункамі. Яны глядзяць на зорнае неба і, пачуўшы сваю прысутнасьць у сусьвеце, саграюцца сьветлымі думкамі пра вечнасьць каханьня. Сяржук Сокалаў-Воюш
То зьнічка згасьне залатая, - пісаў Якуб Колас. Навукоўцы мяркуюць, што ў лінгвістычным сэнсе зьнічка - дачка Зьніча - вечнага паганскага агню. Агонь гэты мелі ўсе славяне, а зьнічку - толькі мы. Жнівень і верасень - самыя зьнічкавыя месяцы ў Беларусі. Нягледзячы на халодныя ночы, закаханыя ў гэты час саграюць адно аднаго ня толькі абдымкамі ды пацалункамі. Яны глядзяць на зорнае неба і, пачуўшы сваю прысутнасьць у сусьвеце, саграюцца сьветлымі думкамі пра вечнасьць каханьня. Сяржук Сокалаў-Воюш