Лінкі ўнівэрсальнага доступу

Навуковыя дасьледаваньні вакол так званага індэксу масы цела (суадносінаў росту і вагі) даюць падставы меркаваць, што атлусьценьне неабавязкова павялічвае рызыку сьмяротнасьці.

«Індэкс масы цела зьяўляецца недасканалай мераю рызыкі сьмяротнасьці, калі ня браць пад увагу такіх фактараў, як крывяны ціск, ровень халестэрыну і цукру ў крыві», — кажа ў New York Times доктар Сэм’юэл Клейн, дырэктар Цэнтру харчаваньня чалавека ўнівэрсытэцкай школы мэдыцыны ў Сант-Луі (штат Місуры).

Доктар Стывэн Гэймсфэлд, выканаўчы дырэктар Цэнтру біямэдычных дасьледаваньняў у Луізіяне, гаворыць, што калі ў людзей з залішняй вагой такія паказчыкі, як ровень халестэрыну, знаходзяцца ў ненармальным дыяпазоне, ёсьць прычына падумаць пра дыету. Але калі гэтыя паказчыкі ў норме — дыета не патрэбная.

Экспэрты таксама выказваюць думку, што само паняцьце «тлушчу» (у адносінах да чалавечага арганізму) павінна быць удакладненае.

«Тлушч сам па сабе не такі ўжо і небясьпечны, як мы думалі, — лічыць прафэсар Камяр Калянтар-Задэ з Каліфарнійскага ўнівэрсытэту. — Наяўнасьць тлушчу на жываце — гэта неабавязкова дрэнна».

Нарэшце, ня выключана, у пэўных выпадках менавіта залішняя вага ў людзей, якія цярпяць ад атлусьценьня, дала ім шанцы жыць даўжэй — у тым выпадку, калі іх дактары своечасова адшукалі нейкія небясьпечныя фактары, што былі прычынаю атлусьценьня — напрыклад, высокі ровень халестэрыну або дыябэт.

Іншымі словамі, тлусты чалавек хутчэй за нятлустага патрапіць да доктара, пройдзе абсьледаваньне і, значыць, мае больш шанцаў выявіць хваробу на раньняй яе стадыі.

Паказаць камэнтары

XS
SM
MD
LG